УИХ дахь Бие даагчдын зөвлөлөөс өнөөдөр Төрийн ордонд энэ долоо хоногт байнгын хороо болон чуулганы нэгдсэн хуралдаанаар хэлэлцэх асуудлаар байр сууриа илэрхийллээ.

    УИХ-ын гишүүн Ц.Даваасүрэн, манай улсын эдийн засаг олон улсын байгууллагын буюу хөндлөнгийн дүгнэлтээр өрийн дарамтад ороогүй, сэрэмжлэх түвшинд хүрсэн гэсэн дүгнэлт гарсан гэж хэллээ. Мөн тэрбээр “ Ирэх оны төсвийн төслийн талаарх байнгын хороодын хэлэлцүүлгийг энэ долоо хоногт багтаан хэлэлцүүлж, хуулийн хугацаанд төсвөө батлуулахаар ажиллаж байна. Төсөвтэй холбоотой ажлын хэсэг байгуулагдсан. Ажлын хэсэг дээр өргөн барьсан төсөвтэй холбогдуулж тодорхой өөрчлөлтийг хийж байгаа. Орон нутаг руу зарим урсгал зардлуудыг шилжүүлэхээр төсвийн төсөлд тусгасан байсан ч эх үүсвэр хангалтгүй гэж үзсэн учраас өнгөрсөн баасан гарагийн нэгдсэн хуралдаанаар болиулсан. Мөн хөрөнгө оруулалтын асуудлыг эзэнгүй орхихгүй байхаар шийдэж байна. Улсын төсвөөр санхүүжүүлж чадахгүй байгаа ажлыг орон нутаг санхүүжүүлнэ гэдэг хүндрэлтэй гэж үзэж байнгын хороо шийдвэрээ гаргасан. Дагалдах хуулиудыг буцаасан. Тиймээс төсвийн хууль хуучнаараа явах болно. Орон нутагт санхүүгийн эрх мэдэл шилжүүлэх ажлыг үе шаттайгаар явуулах ёстой”  гэв. 

УИХ-ын гишүүн Х.Болорчулуун,  улс орны амин судастай газар, газрын тос, төмөр зам зэрэгтэй холбоотой хуулиудад тус бүлгээс гаргасан байр суурь зөв зүйтэй байсан гээд цаашид ч иргэдийнхээ эрх ашгийг хамгаалах тал дээр үр дүнд хүрч ажиллана гэдэгт итгэлтэй байгаагаа илэрхийллээ.

-2015 оны төсөв, мөнгөний бодлогоо хуулийн хугацаандаа баталж чадах уу?

-Төсөв батлахад хязгаарлагдмал цаг хугацаатай. Одоо бол төсөвт анхаарч байгаа хүн алга.  Олонх нь Ерөнхий сайд, Засгийн газрын асуудал руу хошуурч байна шүү дээ. Төсвийн байнгын хороон дээр байгуулагдсан ажлын хэсэг   маргаантай асуудлууд дээр анхаарч ажиллаж байгаа. Өнгөрсөн долоо хоногт ерөнхийдөө төсвийн хүрээний мэдэгдэл өөрчлөгдөхгүй хэвээрээ явахаар болсон. Мөн энэ удаа нэгдсэн төсвөөрөө, хуучин стандартаар батлагдаад  явна. Мэдээж асуудлууд бий. Дутуу орхисон 500-аад обьект байна. Үүний цаана  зээл авсан компаниуд, зээл өгсөн банкууд хүнд байдалд байгаа. Энэ мэт асуудлыг судалж,  арга хэмжээ ав гээд ажлын хэсэгт үүрэг болгосон.

-Энэ байдлаараа төсөвт тодотгол хийх болох уу?

-Тодотгол хийхээс аргагүй. Төсвөө батлаад маргаашаас нь тодотголоо ярих хэрэгтэй болох байх. Яагаад гэхээр сая Засгийн газрын шинэ бүтцээр гурван яам шинээр байгуулагдлаа. Эдгээр яамны санхүүжилтийг хэрхэхийг шийднэ.  Нэгтгэгдсэн яамдын төсвийг нэгтгэх гээд тодотгол хийхээс аргагүй нөхцөл үүссэн. Түүнээс төсвийг нэмж ,  хасах зүйл тодотголоор хийгдэхгүй.