УИХ дахь “Шударга ёс эвсэл”-ийн бүлэг өнөөдрийн хурлаараа эдийн засгийн нөхцөл байдлын талаар хэлэлцсэн байна. Тодруулбал, Эдийн засагт учирсан хүндрэл, хөрөнгө оруулалт саарсан байдал, төсвийн орлогын тасалдал зэргийг Монгол банк мөнгөний бодлогын хүрээнд хэрхэн шийдвэрлэх, үнэ тогтворжуулах хөтөлбөрүүдийн үр дүнгийн талаар мэдээлэл авчээ.

Тус бүлгийн дарга Н.Батцэрэг, “Засгийн газар 2017 онд нэг миллиард ам.долларын өр төлнө. Энэ бол их том тоо.Өрийг хэрхэн төлөх талаар одооноос Засгийн газар, Монголбанк нэгдсэн төлөвлөгөөтэй ажиллах ёстой. Ямар эх үүсвэрээс төлөх, хэзээнээс хуримтлал бий болгож эхлэх, өрийн тодорхой хэсгийг хойшлуулах бол ямар гэрээ хэлцэл байгуулах ёстой талаар санал солилцсон. Бүлгийн зүгээс Засгийн газар, Монголбанк одооноос эхлэн нэгдсэн төлөвлөгөө гаргаж, он дуусахаас өмнө УИХ-нд танилцуулах ёстой гэсэн байр суурьтай байгаа” гэлээ.

Мөн бүлгийн хуралдаанаар Засгийн газрын 41 тусгай сангийн менежментийн талаар хэлэлцжээ. Эдгээр сангийн дийлэнхи нь төсөвтэй харьцдаг, төсвөөс мөнгө авах үүрэгтэй болсон хэмээн тус бүлгээс мэдээллээ. Учир нь нийт төсвийн урсгалын 40 хувь нь сангуудаар дамждаг байна. Тухайлбал, Нийгмийн даатгалын санд иргэд цалингийнхаа шимтгэлийг хуримтлуулж, хожим нь тэтгэвэр авах тогтолцоогоор ажиллах ёстой. Гэвч тус сангийн бланс хасах хэмжээнд хүрэх төлөвтэй байгаа аж.

Энэ талаар бүлгийн дарга Н.Батцэрэг, “Засгийн газрын тусгай сангуудын чиг үүрэг, төсөв, менежменттэй холбоотой асуудлыг яаралтай шийдвэрлэх хэрэгтэй хэмээн тус бүлгээс үзсэн. Тиймээс Сангийн яамны холбогдох хүмүүст тусгай сангуудын тухай хуульд өөрчлөлт оруулах чиглэл өгч байгаа. Сан бол өөрсдөө орлого олж, түүндээ тааруулж зардлаа төлөвлөдөг байх ёстой. Аль болох улсын төсвөөс хамааралгүй байлгах талаар ойрын хугацаанд эрхзүйн өөрчлөлт бий болгох нь зөв юм” гэв.

Мөн “Намрын чуулган эхэлснээс хойш манай бүлэг 2012 оны УИХ-ын сонгуульд  бүлгийн зүгээс гаргасан нийгэм эдийн засаг, улс төрийн мөрийн хөтөлбөрийн хэрэгжилтийн үр дүнг нарийвчлан гаргаж эхэлсэн. Засгийн  газрын түвшинд аль хэсэг нь хэрэгжиж байгаа, УИХ дахь гишүүдийн өргөн барьсан хуулийн батлагдсан байдал, бодлогын хүрээнд хийж буй ажлын талаар судалгаа явуулж байна. Намрын чуулганы төгсгөлд бүлгийн мөрийн хөтөлбөрийн хэрэгжиж эхлээгүй байгаа ажлыг гишүүн бүр хариуцан ажиллахаар зэхэж байна” гэлээ.

Мэдээллийн дараа тэрбээр сэтгүүлчдйин асуултад хариулт өгөв.

-Одоо УИХ-аар 2015 оны төсвийг хэлэлцэж байгаа. Өнгөрсөн долоо хоногт төсвийн 2 дахь хэлэлцүүлэг явах байх гэж бодсон ч амжаагүй. Танай бүлгийн зүгээс ийм богино хугацаанд төсөв хэлэлцэх нь хэр үр дүнтэй гэж үзэж байна вэ?

-Улсын төсөв бол тухайн үеийн улс төрийн тусгал байдаг. Улс төр, эдийн засгийн нэгдмэл бодлогын хүрээнд төсвийн тухай хуулийг баталдаг. Ерөнхий сайдыг огцруулах болон бусад асуудлаар завсарлага авах, ажил удаж байна. Үүнд манай бүлэг шүүмжлэлтэй хандаж байгаа. Тиймээс бид төсвийн ажлын хэсэг дээр ямар санал санаачлага гаргах талаараа ярилцсан. Бид 2015 оны төсөв хэмнэлтийн горимд шилжсэн байх ёстой гэж үзэж байгаа. Тиймээс Сангийн яамны удирдлагуудаас төсвийн урсгал зардлын задаргааг гаргаж өгөхийг шаардсан. Уг задаргаатай танилцаж, хэмнэлт хийх боломжийг эрэлхийлнэ.

-УИХ-ын үйл ажиллагаа удаашралтай байна. Төмөр замын царигаас өөр зүйл батлаагүй гэсэн шүүмжлэл гарсан. Энэ талаар?

-Намрын чуулганаар хэлэлцэх ёстой хэд хэдэн асуудал хойшлогдож байгаа. Төсөв батлагдсаны дараа нийгэм, эдийн засгийн хүрээний гол асуудлуудад УИХ анхаарлаа хандуулах байх. Манай бүлэг ч УИХ-ын нэг бүтцийн хувьд энэ чиглэлд анхаарлаа хандуулж ажиллана.