Өнгөрсөн тав дахь өдөрөөс эхлээд нэгэн этгээд  цахим хуудаснаа "Ирэх нэг дэх өдөр УИХ-ын дарга З.Энхболдын ашиг сонирхолын зөрчил, огцруулах асуудлаарх мэдээллийг олон нийтэд хүргэнэ" гэж сануулах, заналхийлэхийн хооронд байн байн мэдээлэв. Энэхүү жиргээг УИХ-ын дарга олж үзсэн эсэхийг мэдэхгүй юм. Ямар ч байсан түүнд ээлжит сануулга өгөөд эхлэв. Ээлжит гэдгийн хувьд иймэрхүү сануулга дөрөвдэхь удаагийнх байж мэднэ.

    Учир нь "Ерөнхий сайд Н.Алтанхуягийг огцруулах нь АН-ын гишүүдийн нэр төрийн хэрэг" гэж мэдэгдсэн Э.Бат-Үүлийг огцруулах ёстой гэж нийслэлийнхэн гарын үсэг зуруулж эхэлсэн. Дараа нь МАН-ынхантай нийлж Ерөнхий сайдыг огцруулахаар гарын үсэг зурсан УИХ-ын гишүүн Ж.Батзанданг АН-аас хөө гэж аймаг болгоноос дарамт үзүүлсэн. Хамгийн сүүлд Ерөнхий сайдыг огцоруулахаар гарын үсэг цуглуулсан М.Зоригт гишүүнийг туслахын хамт Тагнуулын Ерөнхий газраас дуудсан. Өөрөөр хэлбэл Ерөнхий сайд, АН-ын дарга Н.Алтанхуягийг огцруулахаар байр сууриа илэрхийлсэн гишүүн болгонд ямар нэгэн дарамт очиж байна. Тийм дарамтын ажиллагааг хэн нэгэн зохион байгуулж байна. Хэн байж болох вэ? Ээлжит дарамт энэ долоо хоногт УИХ-ын дарга З.Энхболд руу чиглэх нь тодорхой боллоо. Эсвэл З.Энхболдыг элдэв үйлдэл хийхээс сэргийлж сануулга өгөх маягаар зогсоох гэсэн ажиллагаа ч байж мэднэ.

    Аймгуудын АН-ын даргыг Улаанбаатарт дууджээ. Тэд өчигдөр бөөнөөрөө төрийн ордонд хөлхөлдөж олон хүний анхаарлыг татав. Учир шалтгааныг лавлаж асуувал УИХ-ын дарга З.Энхболдтой уулзах гэж байгаагаа учирлав. Ярианы сэдэв нь УИХ-ын даргад дарамт учруулж, АН-ын УИХ-ын гишүүд Ерөнхий сайдыг огцруулах гээд байна. Та УИХ-ын даргын хувьд гишүүдээ татаж ав. Таныг ч гэсэн Ерөнхий сайдыг огцруулах байр суурьтай байгаа гэж мэдээлэх болов. Хэрэв тийм бол бүх аймгийн АН-ын дарга нар таныг эсэргүүцнэ гэж дарамт үзүүлэх бололтой сураг гарлаа. Хэрэв тэд иймэрхүү зорилгоор яваа бол асуудалд ихээхэн ач холбогдол өгч байгаа хэрэг л дээ. Ер нь сүүлийн үед Ерөнхий сайд Н.Алтанхуягийг өмөөрдөг багийнхан их сонин хүмүүсээр бүрдэв. Ахмадын холбооны Г.Баасан, үе үе хэрүүл тэмцэл хийж ирсэн Т.Хасбаатар, аймгуудын АН-ын дарга нар л байна.

    Хэрэв МАН-ынхан даргынхаа эсрэг дуугарсан гишүүн бүхнийг нухчин дарах гээд байвал коммунистууд, дарангуйлагч гэж ирээд элдэв нэр хочоор их булах байсан даа. Ийм үзэгдэл МАН дотор болж л байсан. Гуравхаан жилийн өмнө МАН-ын дарга, Ерөнхий сайд С.Батболдыг огцоруулахаар УИХ-ын гишүүн Б.Бат-Эрдэнэ, Ц.Батбаяр, Ц.Даваасүрэн, Д.Балдан-Очир нар гүйж байсныг ард түмэн мартаагүй. Тэглээ гээд эдгээр гишүүдээ элдвээр дарамтлаагүй. Маргалдаж байгаад өнгөрсөн дөө.

    Гэтэл ардчилал ярьдаг АН маань үзэл бодол байр сууриа илэрхийлсэн, даргаа шүүмжилсэн гишүүд болгоныхоо эсрэг компанит ажиллагаа өрнүүлдэг систем, бүтэц, тогтолцоог бий болгож эхэллээ. Хэрэв энэ бүтэц, тогтолцоо, системийг АН-ынхан хүлээн зөвшөөрөөд явбал хэзээ нэгэн цагт өөрсдөө хүлээн зөвшөөрсөн энэ зүйлийнхээ золиос болно гэдгээ ойлгохгүй байна. Өөрөөр хэлбэл АН дотор "махны машин" эргэж магадгүй байна. Зөвхөн даргыг магтан дуулах ёстой. Муулж болохгүй. Шүүмжлэх хориотой гэдэг дэглэм журам тогтож магадгүй боллоо.