Эдийн засгийн байнгын хорооны өнөөдрийн хуралдаанаар ЗГХЭГ-ын дэд даргаар ажиллаж байсан Г.Дэнзэнгийн асуудлыг хэлэлцэх байсан ч АН-ын гишүүдийн саналаар хойшлууллаа. Тодруулбал, Эдийн засгийн байнгын хорооны тогтоолоор байгуулагдсан ажлын хэсгээс “Эрдэнэс-Таван толгой” ХК-ийн үйл ажиллагаанд  Үндэсний аудитын газартай хамтран  хийсэн шалгалтын дүнг хэлэлцэх байсан юм. Тус шалгалтаар “Эрдэнэс Тавантолгой” компаниас хууль бусаар 4.6 тэрбум төгрөгийг гаргуулсан хүнийг Г.Дэнзэн гэдгийг батлаад байгаа. Өчигдөр ажлын хэсэг  уг асуудлаар хуралдсан юм.  УИХ-ын гишүүд Г.Дэнзэнгийн асуудлыг УИХ-ын чуулганы хуралдаанаар хэлэлцэж, хариуцлага ноогдуулах ёстой гэж үзэж байгаа. Гэтэл өнөөдөр хурал эхлэх үед МАН-ын гишүүд уг асуудлыг хэлэлцэхийг шахсан ч  гишүүдэд материал тарааж өгөөгүй гэдэг үндэслэлээр АН-ын гишүүд завсарлага авч хойшлууллаа.