МАН-ын бүлгийн гишүүд мэдээлэл хийж Засгийн газрын хэрэг эрхлэх газрын даргаар ажиллаж байсан Г.Дэнзэнгийн “Эрдэнэс-Тавантолгой” компаниас хууль бусаар гаргуулсан мөнгөний баримтуудын заримаас нь олон нийтэд дэлгэлээ.

Өнгөрсөн тавдугаар сарын 24-ны өдөр “Эрдэнэс Тавантолгой” компанид шалгалт явуулах ажлын хэсгийг Эдийн засгийн байнгын хорооны тогтоолоор байгуулж байжээ. Тус ажлын хэсгийг УИХ-ын гишүүн Д.Хаянхярваа ахалсан бөгөөд Үндэсний аудитын газартай хамтран шалгалтыг явуулжээ. Ингээд шалгалтаар тус компаниас маш олон ноцтой баримтуудыг илрүүлсэн гэдгийг ажлын хэсгийн ахлагч Д.Хаянхярваа хэллээ.

Тэрбээр “Төрийн өмчийн оролцоотой компаниудад хууль, хяналт хэрэгжихээ байсан үйлдлүүд их байгааг энэ шалгалтаар нотоллоо. Ялангуяа санхүүгийн тайлан нь маш будлиантай байдаг юм байна. Ер нь төрийн өмчийн компаниуд их үрэлгэн байна. Тухайлбал, “Эрдэнэс-Тавантолгой” компанийн Улаанбаатар дахь оффист л гэхэд нийт 123 хүн ажиллаж байна. Тэд нар нь бүгд сонгуулийн дараа хэн нэгний шахаасаар орсон хүмүүс. Энэ бол тус компани орон тооны илүүдэлтэй ажиллаж байгаагийн илрэл. Тэр хэрээр үргүй зардал их гарч байгаа нь санхүүгийн аудитын шалгалтаар нотлогдсон” гэв.

Мөн төлөөлөн удирдах зөвлөлийн гишүүд, дарга нар нь маш өндөр цалин хангамж авч байна гэлээ. Тодруулбал, ТУЗ-ын даргадаа 6 сая бусад гишүүддээ сард 1,8 төгрөгийн цалин өгдөг аж. Энэ нь Засгийн газрын тогтоосон журмын дагуу төрийн өмчийн компанийн захирал, удирдах зөвлөлийн дарга, гишүүд нь хөдөлмөрийн хөлсний доод хэмжээг хоёр дахин нэмэгдүүлснээс дээш хэмжээний цалин, урамшуулал авч болохгүй гэх журам байдгийг зөрчсөн байгаа юм. 400 мянга орчим төгрөгийн цалин авах ёстой хүн зургаан саяыг авч байгаа нь хууль бус гэж тэрбээр хэллээ. ТУЗ-ын гишүүдийн цалинг ингэж нэмэх шийдвэрийг Г.Дэнзэн гаргасан аж. Тэрбээр энэ компанийн ТУЗ-ын даргаар ажиллаж байхдаа энэ шийдвэрийг гаргасан байна. Тухайлбал, Засгийн газрын шийдвэрийг зөрчин байж өөрийнхөө цалинг нэмсэн гэсэн үг. Мөн тус компани нь Төрийн өмчийнх мөртлөө Төрийн өмчийн хорооны хяналтанд байдаггүй аж. Мөн ажлын хэсгийн дүгнэлтэнд “Говь повер” компанийн тендерийг хүчингүй болгосонтой холбоотойгоор тус компаниас хөрөнгө оруулалт хийсэн хэмээн долоон тэрбум төгрөгийн хохирол нэхэмжилж, үүнийг нь шүүхийн явцад хоёр тал харилцан тохиролцоод 4,7 тэрбумыг “ЭрдэнэсТавантолгой” компаниас “Говь повер” ХХК-д шилжүүлж байжээ. Энэ компани нь Г.Дэнзэнгийн эхнэр Г.Уянгынх юм байна. Уг үйлдлийг АТГ шалгах ёстой гэсэн дүгнэлтийг ажлын хэсгээс гаргажээ. Эдийн засгийн байнгын хорооны хурал дээр уг асуудлын дэлгэрэнгүйг олон нийтэд ил болгох аж.