УИХ-ын Төрийн байгуулалтын байнгын хороо өнөөдөр /2014.11.04/ үдээс хойш хуралдаж, Монгол Улсын 2015 оны төсвийн тухай, Нийгмийн даатгалын сангийн 2015 оны төсвийн тухай, Хүний хөгжил сангийн 2015 оны төсвийн тухай хуулийн төслүүдийн хоёр дахь хэлэлцүүлгийг хийлээ. Хуралдаанд тус Байнгын хорооны эрхлэх асуудлын хүрээнд хамаардаг төсвийн ерөнхийлөн захирагч, холбогдох удирдах ажилтнууд оролцсон юм.Хуулийн төслүүдийн анхны хэлэлцүүлэгтэй холбогдуулан Байнгын хорооны гишүүдээс асуулт гарсангүй. Харин зарчмын зөрүүтэй санал гаргасан гишүүдийн саналын томъёололтой холбогдуулан санал гаргасан гишүүд болон ажлын хэсгээс Байнгын хорооны гишүүд асуулт асууж тодруулсны дараа гишүүдээс гаргасан зарчмын зөрүүтэй саналын томъёоллоор санал хураалт явуулав. Тухайлахад, 2016 онд манай улсад Европын аюулгүй байдал, хамтын ажиллагааны байгууллагын Парламентын Ассамблейн хуралдаан болохтой холбогдуулан уг хуралдааны бэлтгэл ажлыг хангахад зориулан УИХ-ын 2015 оны төсөвт 978.1 сая төгрөг нэмж тусгахаар УИХ-ын гишүүн Н.Энхболд, М.Батчимэг нарын гаргасан саналыг хуралдаанд оролцсон гишүүдийн 78.6 хувь нь дэмжив.
Мөн УИХ-ын гишүүн Д.Эрдэнэбат, М.Батчимэг нар 2016 онд Улаанбаатар хотод болох Ази, Европын дээд хэмжээний уулзалтын бэлтгэлийг хангахад зориулж 47 тэрбум төгрөгийг ирэх оны улсын төсөвт нэмж тусгах санал гаргасан нь олонхын дэмжлэг авсан юм. Түүнчлэн УИХ-ын гишүүн М.Энхболд, Су.Батболд нарын гаргасан эрүүл мэнд, цагдаа, онцгой байдлын албанаас бусад төсвийн болон төрийн өмчит байгууллагуудын ирэх оны шатахууны зардлыг 30 хувь бууруулах саналыг хуралдаанд оролцсон гишүүдийн олонх нь дэмжсэн бол УИХ-ын гишүүн Су.Батболд, Ч.Хүрэлбаатар нар төрийн захиргааны төв болон нутгийн байгууллагуудын орон тоог 10 хувиар бууруулах санал гаргасан нь олонхын дэмжлэг авсангүй. Харин УИХ-ын гишүүн Д.Эрдэнэбат, Р.Бурмаа, Р.Гончигдорж нарын гаргасан зарчмын зөрүүтэй саналыг гишүүдийн олонх нь дэмжсэн юм.
Ингээд ирэх оны төсвийн тухай хуулиудын төслийн анхны хэлэлцүүлгийг хийсэн талаарх Байнгын хорооны санал, дүгнэлтэд төсвийн ерөнхийлөн захирагч нараас нийлүүлэх бүтээгдэхүүний чанар, өгөөж, хөрөнгө оруулалтын менежмент, үр ашгийг дээшлүүлэхэд анхаарах, олон улсын чанартай хурал зөвлөгөөн зохион байгуулах орчин үеийн шаардлагад нийцсэн зориулалтын төвтэй болох, энэ ажилд хувийн хэвшлийнхнийг татан оролцуулах зэрэг асуудлыг тусгаж Төсвийн байнгын хороонд хүргүүлэхээр тогтлоо гэж Улсын их Хурлын Тамгын газрын Хэвлэл мэдээлэл, олон нийттэй харилцах хэлтэс мэдээлэв.
