Тодруулбал, УИХ-ын гишүүн О.Баасанхүү "Ерөнхий сайд Н.Алтанхуягийг огцруулахаар өргөн барьсан бичигт түүний хамаатан, садан, зөвлөх, туслахтай холбоотой хэргүүдийг дурьдсан байна. Энэ талаар АТГ-аас асуумаар байна. Тэгэхээр энэ хуралд АТГ-ыг оролцуулах ёстой шүү дээ. Ер нь АТГ-аас Хууль зүйн сайд Х.Тэмүүжинг шалгуулахаар өгсөн бичгийн хариуг авмаар байна. Мөн олон хүний хэргийг асуумаар байна. Энэ байгууллага яагаад хуралд суухгүй байна. Ерөнхий сайдаас нэг зүйл асуумаар байна. Таныг Дэнзэнгийн хадам аав гээд байх юм. Тэр үнэн юм уу" гэв.

Түүний асуултад Төрийн байгуулалтын байнгын хорооны дарга А.Бакей хариулахдаа "Ерөнхий сайдыг огцруулах асуудал нь Монгол улсын хэмжээний асуудал. Тэгэхээр бид энэ асуудалд хуулийн дагуу маш нухацтай ярьж байж шийдвэр гаргах хэрэгтэй. Ерөнхий сайдыг огцруулахаар өргөн барьсан бичгийн дөрөв дэх заалтад Н.Алтанхуягийг хамаатан садан, туслах зөвлөх нартай нь холбоотой зүйлүүдийг тусгажээ. Уг нь ЕС-ын хамаатан садны асуудал бол тэдний л асуудал. Тэднийг хууль бус зүйл хийсэн гэдгийг нь хууль, хяналтын байгууллага тогтоогоод тусдаа шийдвэрлэх ёстой. Энэ асуудлыг Ерөнхий сайдын асуудалтай холбож болохгүй. Тэгэхээр өнөөдөр Ерөнхий сайдын хамаатан, садан бус Ерөнхий сайдын л асуудлыг хэлэлцэх ёстой. Харин тэр хүмүүсийн  буруутай нь тогтоогдвол хуулийн байгууллагаар тогтоогоогүй байхад ингэж олон нийтэд гэм буруутай мэтээр ойлгуулж болохгүй. Энэ нь өөрөө хүний эрх, эрх чөлөөтэй холбоотой хуулийн заалтыг зөрчсөн байна. Монгол улсын хуулинд хүний гэм буруутайг тогтоогоогүй тохиолдолд ингэж олон нийтэд буруутай мэтээр зарлахыг хориглодог" гэв.

Харин Л.Цог гишүүн "МАХН-тай байгуулсан гэрээ ямар учиртай юм бэ. Энэ гэрээ үндсэн хуулийг зөрчсөн төдийгүй УИХ-ын гишүүдийг үг хэлэх, үзэл бодлоо илэрхийлэх эрхийг боомилсон зүйл болсон. Мөн "Оюутолгой"-н ТУЗ-ын даргаар ажиллаж байсан  Ц.Сэдваанчигийг яагаад хууль бусаар халсан юм бэ" гэж Ерөнхий сайдаас асуув.

Ерөнхий сайд Н.Алтанхуяг түүний асуултад хариулахдаа "Хоёр намын хоорондын гэрээ бидэнд хамаагүй. Ажлын хэсэг гараад ахиж ажиллахаар болсон. Ц.Сэдваанчигийн хувьд Засгийн газрын өмнөөс дураараа бичиг үйлдсэн учраас ажлаас нь чөлөөлсөн. Мөн Төрийн сайдыг  тагнаж чагнасан хэрэгт орооцолдсон учраас ёс зүйн хувьд алдаа гаргасан гэж үзэж байгаа. АН-ын гурван гишүүнийг казиногийн хэргээр шоронд хийж байсан. Дараа нь татварын асуудлаар бас хорьсон. Үүнийгээ давтахгүй байх гэж бодож байна" гэв. 

Чуулганы хуралдаан үргэлжилж байна.

Т.Энхэлээ