Чуулганаар яг одоо Ерөнхий сайдыг огцруулах асуудлыг ярьж байна. Гишүүдийн санал асуулга дууссаны дараа гишүүд Ерөнхий сайд Н.Алтанхуягийн болон засгийн газрын талаарх өөр өөрийн дүгнэлтүүдээ хэлж байна.

Тодруулбал УИХ –ын гишүүн З.Баянсэлэнгэ “Ерөнхий сайдыг огцруулах асуудлыг нэлээд удаан ярилцлаа.  Өнөөдөр байнгын хорооны хурал дээр Ардчилсан намынхан маань шийдвэрээ гаргалаа гэж бодож байлаа. Харамсалтай нь зарим гишүүдийн утсанд “Хуралд битгий ирээрэй” гэсэн мессеж иржээ. Энэ мессежийг МАН –аас явуулсан гэж сонсогдож байна. Энэ хуралд ирээгүй хүмүүсээ харвал эргэлзээд ямар нэгэн бүлэг, фракцын ятгалагд ороод төрийн ажлыг цалгардуулж байна. Өнөөдөр УИХ – д өнөөдөр эрх мэдлийн тэмцэл, хувь улс төрчийн хийрхэл, амин хувийн ашиг сонирхолын төлөө мөн албан тушаалын төлөө ажиллаж байна.  Улс төрийн намууд сонгуульд оролцохдоо мөрийн хөтөлбөрөөр, намынхаа үзэл баримтлалаар өрсөлддөг.  Тэр үед хуваагдал, талцал маш их явагддаг. Сонгуулийн дараа тэр талцалаа ард түмний төлөө гэж хэт их улс төржүүлж тайлбарладаг. Сонгогдоод ажиллаж байхдаа хоорондоо нэгдэж чаддаггүй.  Зөвхөн засагт орсон нөхцөлд л нэгдэнэ гэдэг байр сууриас ханддаг болжээ.  Төрийн байгуулалтын байнгын хороон дээр Ерөнхий сайдын асуудлыг хэлэлцэх үеэр гэмт хэрэг үйлдсэн гэж ярьлаа. Хэрэв гэмт хэрэг үйлдсэн бол хууль шүүхээр тогтоосон байх ёстой.  Бусдын хийсэн хэргийг өөр хүнд эрх мэдэл, албан тушаалаас нь хамаарч нялзаамааргүй байна. Ард түмнийхээ төлөө энэ 76 гишүүд маань нэгдээд нэг санаа бодолтой ажиллаж болдоггүй юм уу” гэж хэллээ.

Мөн УИХ –ын гишүүн, ССАЖ яамын сайд Д.Оюунгэрэл “Хууль дагаж хүзүү гэдэг шиг зүйл Ерөнхий сайдыг огцруулах асуудалд үүслээ. Яагаад гэвэл МАН –ын өргөн мэдүүлсэн бичигт яг Лхүмбийн хэрэг шиг заалт явж байгаа. Өнөөдрийн энэ Ерөнхий сайдын зөвлөх Л.Гансүх гэдэг хүний хэрэг бол орчин цагийн Лхүмбийн хэрэг болчихлоо. Өчигдөр АТГ –ын мэдэгдлийг сонссон 118 хуудас шинжээчдын дүгнэлтийг үндэслэж хэрэг яриг гээд байгаа. Тэр шинжээчийн дүгнэлт гэдэг 118 хуудас бичгийг нь өөрт нь ч уншуулдаггүй, өмгөөлөгчид нь ч үзүүлдэггүй хариу няцаалт хийлгэдэггүй.  Өнөөдөр бид 30 –аад оны хэрэг шиг улс төрийн шийдвэрийг гаргах гээд  сууж байна. Тиймээс би энэ шийдвэрийг маш их эсэргүүцэж байна. Бид улс төрийн шийдвэр гаргах гэж байгаа бол цэвэр улс төрийн шийдвэр гарах нь зүйтэй. Эдийн засгийн шийдвэр гаргах гэж байгаа бол цэвэр эдийн засгийн шийдвэр гаргах хэрэгтэй. Яагаад бид далимдуулж Монгол хүний эрхийг зөрчих асуудлыг давхар оруулж ирдэг юм бэ. Х.Тэмүүжин сайдыг огцруулах асуудлыг далимдуулаад баахан хүний эрхийг зөрчих асуудлыг гаргаж тавьсан. Одоо Н.Алтанхуяг сайдын асуудал дээр дахиад ийм байдал гаргалаа. Яагаад МАН –ынхан өргөн мэдүүлсэн бичиг болгон дээрээ хүний эрхийг зөрчиж байдаг юм бэ. Яагаад 1937 оныхоо муу, муухайг хаяж чадахгүй, XXI зуундаа цэвэрхэн явж чаддаггүй юм бол гэдэг дээр би маш их бухидаж байна. УИХ дарга ч гэсэн үндсэн хуулиа яриад тогтоолын төслийн буцааж өгөх боломж байсан. Гэрээний эрхийн харилцаа гэдгийг хуульчид маань ойлгоосой. Төрөөгүй хүүхэд алаагүй баавгайн төлөө хэрэгт буруутгаж байна. Мөн дэлхийн ямар ч ардчилсан улсад байхгүй сэжигтэнийг өмгөөлсөн өмгөөлчийг цагдан хорьж байцаадаг боллоо. Өмгөөлөгчөө байцаахаар л шууд 100 хувийн дарангуйлалын систем руу яваад орчихдог юм. Өнөөдрийн энэ огцруулах кноп бол өнгөрсөн хорин хэдэн жилийн ололт амжилтыг үгүй хийсэн бохир санал хураалт болно” гэсэн юм.

Харин УИХ –ын гишүүн Г.Уянга “Сая байнгын хорооны хурлын дараа олон хүн баярлалаа, гомдлоо гэж утасдаж байна. Энэ бол хэн нэгнийг баярлуулах эсвэл гомдоох гэсэн шийдэл биш. Надад ямар нэг бүлэг эсвэл намаа дагах гэсэн сонирхол байсангүй. Эцсийн мөчид огцруулах эсэхийг АН  өөрсдөө шийднэ. Унагах эсэхээ өөрсдөө л мэднэ. Өнөөдөр АН муухай МАН муухай гээд бие биенээ хэлж байна. Өнөөдрийн энэ байдал бол танай хоёр намын л буруу. Малын бэлчээргүй, утаа хэмжээгээ давлаа, иргэд итгэл үнэмшилгүй болчихлоо гэвэл энэ та хоёрын л бүтээл. Бид өнгөрсөн жилүүдэд гаднаас биш өөрсдөөсөө хамаардаг улс орны байгуулах хэрэгтэй байсан. Анх эвсэл байгуулахыг би ганцаараа эсэргүүцсэн. “Шударга ёс” эвсэл өнгөрсөн сонгуулиар 23 хувийн санал авсан. Гэтэл өнөөдөр амлаж байсан амлалтаасаа биелүүлж чадсангүй. Өнөөдрийн эрх баригчдын хийдэг ажил бол албан тушаал юм бол би өөрийгөө эрх баригч гэж хэлэхгүй. Хэн хэнийгээ муучлах хэрэг байхгүй. Үндсэн хуулийн хүрээн байгуулагдсан сүүлийн засгийн газар бол  Н.Алтанхуягийн засаг байлаа. Бид шинэ үндсэн хууль ярих цаг болжээ. Ерөнхий сайд үлдсэн ч эс үлдсэн ч энэ ажилд гар бие оролцоосой гэж хүсч байна. Та бүхэн Монголоо зовлонгоос гаргах гэж олон жил зүтгэсэн. Одоо түүнийгээ үргэлжлүүлэх цаг болсон. Зарим гишүүд МАН гаргасан учраас энэ байдлыг дэмжихгүй гэж байна. Харин надад тийм зүйл байхгүй олон хоног бодож байж энэ шийдвэрийг гаргасан” гэв.

МАН –ын бүлгээс өргөн мэдүүлсэн Ерөнхий сайдыг огцруулах тогтоолын төсөлд гарын үсэг зурсан АН –ын гишүүн Ж.Батзандан “Ард түмэн энэ асуудлыг анхаарлтай ажиглаж байна. Энэ бол АН –ын асуудал биш ээ. Монгол Улсын засгийн газрын бүтэц, төрийн хариуцлагын талаар ярьж байгаа юм аа. Зарим хүмүүс нэг намын намын бүлэг Ерөнхий сайдыг огцруулах гэж байна гээд буруу ойлгож сууна. Үндсэн хуулийн зүйл заалтын дагуу эрхээ л эдэлсэн. Нам болон намын бүлэгт Ерөнхий сайдыг огцруулах санал гаргах эрх байхгүй. Сүүлийн үед УИХ –ын гишүүдэд сумын засаг дарга нар янз бүрийн дарамт үзүүлдэг болжээ. Монгол Улсын үндсэн хуулиар төрийн төв байгууллага орон нутгийн асуудал руу орохыг, орон нутаг төрийн төв байгууллагын асуудал руу орохыг хориглосон байдаг. Тиймээс араамандаа яажигнах хэрэгтэй, ажлаа шат шатандаа хийх хэрэгтэй гэж хэлмээр байгаа юм. Дээрээс нь зарим хүмүүс засаглал тогтворгүй байна гэж ярих болж. Энэ бол засаглал тогтворгүй биш харин засаглалыг хариуцлагатай, ёс зүйтэй болгох шийдвэр юм. Хууль бус үйлдэл нь хэрээс хэтэрсэн, гаргасан шийдвэр бүр нь  хууль бус байгаа энэ засагт хариуцлага тооцох хэрэгтэй. Эдийн засгийн алдаатай бодлого явууллаа. Иргэд худалдан авах чадвараа алдлаа. Монгол Улс нэг хүнд ноогдох өрөөрөө дэлхийд тэргүүлэхэд бэлэн боллоо. Энэ бол Н.Алтанхуягийг огцруулах хангалттай үндэслэл.  АН –ын Монгол, МАН –ын Монгол гэж байхгүй нэгдсэн Монгол Улс гэж л бий. Хариуцлагатай төрийн төлөө хамтдаа шийдвэр гаргах ёстой” гэсэн юм.

Чуулганы хуралдаан үргэлжилж байна.