Ерөнхий сайд Н.Алтанхуягийг огцруулах асуудлыг чуулганы хуралдааны үеэр хэлэлцэх үер хэлсэн зарим гишүүдийн үгийг хүргэж байна.

Р.Бурмаа: Монгол Улсын баатар Э.Бат-Үүлийн хэлсэнчлэн "АН-ын гишүүний ариун үүрэг"-ээ би биелүүлж Н.Алтанхуягийг огцруулах санал би өгнө. Ардчилалын үнэт зүйл болсон сонгох сонгогдох эрх чөлөөнд бүдүүлгээр халдсан МАХН-тай гэрээ байгуулсан энэ ёс зүйгүй үйлдлийнх нь төлөө огцруулах хангалттай үндэслэл тул огцруулах саналтай байна. АН-ын дарга Н.Алтанхуяг нь УИХ-д хамгийн олон суудалтай намыг төлөөлөн МАХН-ын даргатай 15 зүйл бүхий 2024 он хүртэл хүчинтэй байхаар хамтран ажиллах гэрээг  байгуулсан нь МУ-ын Үндсэн хууль, холбогдох бусад хуулийг зөрчсөн гэж үзэж байна. Ардчиллын амин сүнс нь шударга сонгууль байж, сонгуулийн үр дүн нь гагцхүү шударга сонгуулиар шийдэгддэг байтал сонгуулийн тойрог тохиролцох нэрийн доор АН-ын нэрийн өмнөөс МАХН-ын дарга Н.Энхбаярын өмнө үүрэг хүлээх замаар гэрээ байгуулсан нь Сонгогчдыг үл хүндэтгэсэн, ардчиллын үнэт зүйлийг үгүй хийсэн, ҮХ зөрчсөн үйлдэл боллоо. Мөн гэрээнд АН болон МАХН нь улс орны хэмжээний томоохон бүтээн байгуулалтын төслүүдийг гардан хариуцна гэсэн байгаа нь нам аж ахуйн үйл ажиллагаа явуулахгүй байх хуулийн заалтыг зөрчиж байна. ...гэтэл төрийн чиг үүргийг намын дээр гарган, энэ чиг үүргийг МАХН-ын дарга Н.Энхбаяртай тохиролцон гэрээ байгуулсан нь ҮХ нийцээгүй үйлдэл болсон.

Д.Эрдэнэбат: Улс орон, засаг төр тогтвортой байх ёстой. Байнгын хороон дээр техникийн алдаанаас болж буруу кноп дарагдсан талаар улс төр хийж байгаад эмзэглэж байна. Улс орны тогтворгүй байдлыг ашиглаж янз бүрийн буруу мэдээлэл тарааж байгаад харамсаж байна. Хүний эрхийг, Үндсэн хуулиа зөрчиж огцруулах асуудлыг оруулж ирж байгаад харамсаж байна. Шинээр Засгийн газар байгуулах болвол маш их хүндрэлүүд үүснэ. Улс орон цааш хөгжихөд садаа болно.
 
С.Баярцогт: Цөөнхөөсөө болж огцордог Засгийн газар гэж байдаггүй. Бид кнопоор шийддэг зарчмаасаа татгалзах хэрэгтэй. Огцруулах асуудлыг кнопоор шийдэх нь Монголын улс төрийн төлөвшлийг удаашруулж байдаг.  1996-2000 оны гунигт дүр зураг байнга харагддаг. Тэр нь Монголын улс төрийн төлөвшлийг 10-20 жилээр хойш чангаасан гэж үздэг.  Бид хамтраад явж байсан бол ийм зүйл болохгүй байсан байх аа ...

Х.Тэмүүжин: Нэг нэгнийхээ уулыг шагайж, хэн нь дарга болох асуудал дээр бөөнөөрөө ирж суусан 2 жилийг өнгөрөөлөө. Хэрэлдэх хэмлэлдэх болгонд хожигдол нь бидэнд, хожил нь гадна ирж байна. Засгаа унагаж байгаа нь УИХ дээр цөөнхийн асуудал биш олонхийн асуудал гэдэг нь үнэн.