Улсын Их Хурлын Аюулгүй байдал, гадаад бодлогын байнгын хороо, АНУ-ын Азийн сан, Авилгатай тэмцэх газар, Эмэгтэй удирдагч сан, Монгол Улсын Их сургуулийн удирдлагуудтай хамтран “Авилга үндэсний аюулгүй байдалд нөлөөлөх нь” сэдэвт онол практикийн бага хурлыг өнөөдөр /2014.11.06/ Төрийн ордонд зохион байгуулж байна.Хуралд Улсын Их Хурлын дэд дарга Л.Цог, Улсын Их Хурлын гишүүн, Аюулгүй байдал, гадаад бодлогын байнгын хорооны дарга Ц.Оюунбаатар, Улсын Их Хурлын гишүүн, Хууль зүйн байнгын хорооны дарга Д.Ганбат, АНУ-ын Азийн сангийн Суурин төлөөлөгч Мелони Линдберг, Авилгатай тэмцэх газрын хэлтсийн дарга Э.Амарбат нар болон төрийн болон төрийн бус байгууллагын төлөөллүүд оролцож авилгаас урьдчилан сэргийлэх үр дүнтэй арга замыг тодорхойлж, цаашид хэрэгжүүлэх төлөвлөгөө боловсруулахад тулгарч буй саад бэрхшээлийг хөндөн хэлэлцэж байна.
Улсын Их Хурлын дэд дарга Л.Цог онол практикийн бага хурлыг нээж үг хэлэв. Тэрээр энэхүү хэлэлцүүлгийг хамтран зохион байгуулж буй АНУ-ын Азийн сангийн Суурин төлөөлөгч, хатагтай Мелони Линдберг болон бусад байгууллагын төлөөлөгчдөд талархал илэрхийлээд авилгатай тэмцэх шинэ алхам хийхэд энэхүү хурал үр дүнгээ өгнө гэдэгт найдаж буйгаа онцлов.
Мөн тэрээр “Монгол Улс нэг үеэ бодоход авилгатай тэмцэх бүтэцтэй болсон. Түүгээр ч зогсохгүй эрх зүйн орчин бүрдсэнийг хэлэхэд таатай байна. Авилгын асуудал үндэсний аюулгүй байдалд нөлөөлөхүйц төвшинд хүрнэ гэдэг аюултай. Энэ авилгатай тэмцэх асуудал өөрөө олон нийтийг хамарч чадахгүй байна.Тиймээс авилгатай тэмцэх шинэ алхам хийхэд энэхүү онол практикийн бага хурал ихээхэн үр дүн өгнө гэдэгт олзуурхаж байна” гэв.
Дараа нь Улсын Их Хурлын гишүүн, Аюулгүй байдал, гадаад бодлогын байнгын хорооны дарга Ц.Оюунбаатар “ Авилгатай тэмцэх замаар үндэсний аюулгүй байдлыг бэхжүүлэх нь” сэдэвт илтгэл тавилаа.Тэрээр илтгэлдээ Монгол Улсын Ерөнхийлөгчийн санаачилсан Шилэн дансны тухай хууль авилгатай тэмцэхэд ихээхэн үр дүн өгнө гэсэн хүлээлт бий болгоод байгаа талаар онцлоод энэхүү хууль нь авилга бий болгоход нөлөө үзүүлдэг төрийн үйлчилгээг сайжруулахад онцгой ач холбогдолтой хэмээв. Мөн тэрээр улс төрийн намуудын сонгуульд зарцуулж буй хөрөнгийн зардалд хийсэн судалгааны дүнг танилцуулсан бөгөөд 2012 оны Улсын Их Хурлын сонгуульд зарцуулсан хөрөнгийн хэмжээ өмнөх 2008 онтой харьцуулахад 4 дахин нэмэгджээ.
Мөн энэ үеэр АНУ-ын Азийн сангийн Суурин төлөөлөгч Мелони Линдберг үг хэллээ. Тэрбээр онол практикийн бага хурлыг хамтран зохион байгуулж, дэмжин ажиллаж буйдаа баяртай байна хэмээгээд АНУ-ын Азийн сан Монгол Улсад үйл ажиллагаа явуулахдаа ардчиллыг дэмжин, сайн засаглалыг хөгжүүлэх чиглэлд түлхүү анхаарч байгаа талаар онцлон хэлэв.
Мөн тэрээр “Өнөөдрийн хэлэлцүүлгийн үр дүнд өндөр түвшний авилга Монгол Улсад хэрхэн тодорхойлогдож байгаа талаар нэгдсэн ойлголтод хүрч, энэ асуудлыг шийдвэрлэх бодлогын зөв арга замыг олох ач холбогдолтой юм. Азийн сан Монгол Улсад засаглал ил тод байдлыг дэмжих хөтөлбөрийг сүүлийн хоёр жилийн хугацаанд хэрэгжүүлсэн бөгөөд тус хөтөлбөр нь өнөөдрийн хурлыг зохион байгуулах үндэс суурь болсон. Бид төсөл хэрэгжих хугацаанд ил тод байдлыг нэмэгдүүлэх чиглэлээр Эмэгтэй удирдагч сантай нягт хамтран ажиллалаа” хэмээв.
Авилгатай тэмцэх газрын Урьдчилан сэргийлэх, соён гэгээрүүлэх хэлтсийн дарга Б.Бат-Отгоны хийсэн мэдээллээр Авилгатай тэмцэх газар өнгөрсөн 2012,2013 онд эрүүгийн 351 хэрэг шалгасан бөгөөд давхардсан тоогоор 693 хүн хэрэгт холбогджээ.Эдгээрээс 372 нь төрийн захиргааны, төрийн үйлчилгээний, төрийн тусгай албан тушаалтан байсан аж. Мөн Авилгатай тэмцэх газар сүүлийн хоёр жилд 123 тэрбум төгрөгийн хохирол илрүүлсэн бөгөөд 9,4 тэрбум төгрөгийн нөхөн төлүүлжээ.Энэ нь 2010, 2011 онуудтай харьцуулахад 9 дахин нэмэгдсэн үзүүлэлт юм.
Хуралд оролцож буй төлөөллүүд авилгаас урьдчилан сэргийлэх соён гэгээрүүлэх ажлыг эрчимжүүлэх, Улсын Их Хурлаар хэлэлцдэг хуулийн төслүүдэд авилгатай холбоотой эрсдэлд үнэлгээ хийх, авилгатай aтэмцэх чиглэлээр стратегийн хөтөлбөр боловсруулах зэрэг олон чухал санал дэвшүүлэв хэмээн Улсын Их Хурлын Тамгын газрын Хэвлэл мэдээлэл олон нийттэй харилцах хэлтсээс мэдээлэв.
