Маргааш АН-ын Үндэсний зөвлөлдөх хороо хуралдаж Ерөнхий сайдад нэр дэвшүүлэх хүнийхээ нэрийг сонгоно. Өчигдөр тус намын гүйцэтгэх зөвлөл хуралдаад хурлын товоо гаргасан нь энэ юм.

Тэгвэл өчигдрийн хуралдаан дээр Ерөнхий сайд асан Н.Алтанхуяг намынхаа гишүүдийг гайхшруулсан нэгэн сонирхолтой мэдэгдлийг хийсэн байна. Тэрбээр АН-ын даргынхаа ажлыг өгөхгүй гэдгээ энэ үеэр илэрхийлжээ. АН-ын одоо мөрдөгдөж буй дүрэмд намын дарга Ерөнхий сайд байна гэж заасан байдаг. Гэтэл тэрбээр энэ дүрмийг өөрчлөх ёстой гэжээ. Өөрөөр хэлбэл намын дарга Ерөнхий сайд болох албагүй. Ерөнхий сайдаар хэнийг ч томилж болно гэж хэлсэн байна.

Угтаа бол намын дарга Ерөнхий сайд болно гэсэн заалтыг АН-ын дүрэмд Н.Алтанхуяг өөрөө оруулж ирж байжээ. Өөрөө ийм дүрмийг зохиож намын дарга, Ерөнхий сайд болчихоод албан тушаалаасаа буунгуутаа “Би намын даргын ажлаа өгөхгүй. Заавал намын дарга Ерөнхий сайд болох албагүй” гэж хэлж буй нь ёс зүйн хувьд зохимжгүй гэж намын гишүүд нь үзэж байгаа юм байна. Тиймээс ч энэ асуудлаас болж Н.Алтанхуягийг эсэргүүцэж нилээн маргаан дэгдсэн сурагтай.