Монголын сагсан бөмбөгийн холбоонд С.Эрдэнэ сайдын тарьж байгаа балаг хэрээс хэтэрлээ. Түүний Монголын сагсан бөмбөгийн хаан байх хүсэл шунал нь Монголын сагсан бөмбөгчдийг олон улсын тэмцээнээс хасагдахад хүргэлээ. Үндэсний сагсан бөмбөгийн холбоо гэх төрийн бус байгууллагыг байгуулж түүнийхээ тэргүүнээр өөрийгөө өргөмжилсөн тэрээр Монголын сагсан бөмбөгийн холбоог \МСБХ\хоёр хувааж, лигийн тэмцээнийг нь хүртэл хүчээр булаагаад авчихсан. Гэтэл одоо Монголын сагсан бөмбөгийн шигшээ багийг олон улсын тэмцээнд битгий явуул гэдэг бичгийг үндэсний олимпийн хороонд явуулж шигшээ багаа тэмцээнд оролцох эрхийг нь хасуулж сууна. FIBA буюу олон улсын сагсан бөмбөгийн холбоонд МСБХ гишүүнчлэлтэй байдаг. Тиймээс ч олон улсад Монгол Улсаа төлөөлөн оролцох баг тамирчдыг МСБХ бүрдүүлж зохион байгуулдаг. Харин С.Эрдэнэ сайд өөрийнхөө байгуулсан Монголын үндэсний сагсан бөмбөгийн холбоо \МҮСБХ\ энэ бүх эрх мэдлийг авах ёстой гэж улайран өөрөө л биш бол үндэсний шигшээг өөр хэн ч бүрдүүлэх ёсгүй гэх байдлаар хандаж байгаа нь их спортод элэгтэй, сэтгэлтэй хүний ааш араншин мөн гэж үү. Тэрээр өөрийн нарийн бичгийн дарга Н.Тулга гэх залуутай нийлж суугаад “Монголын сагсан бөмбөгийн холбоо юу ч хийгээгүй, харин үндэсний сагсан бөмбөгийн холбоо гарч ирснээр энэ спортыг жинхэнэ утгаар нь хөгжүүлж байна” гэж ярих дуртай.
МСБХ-ны үйл ажиллагаанд алдаа байхыг үгүйсгэхгүй. Идсэн уусан, хоцрогдсон, дампуурсан жилүүд ч бий. Гэлээ гээд асуудлаа холбооныхоо хүрээнд шийдэхээс өөр холбоо байгуулан салан тусгаарлаж, сагсан бөмбөгийн спортыг хувааж самарч байгаа нь тамирчид спорт сонирхогчдод огтхон ч таалагдахгүй байна. Зөвхөн сагсан бөмбөгийн холбоо гэлтгүй бүх спортын холбоодод л хэрүүл тэмцэл явагдаж байдаг. Хамгийн сүүлийн жишээ л гэхэд хөл бөмбөгийн холбооны тэмцэл байна. Гэлээ гээд өөр аль нь өөр холбоо байгуулж анхдагчаа нухчин дараагүй. Үндэсний хөл бөмбөгийн юм уу үндэсний жудо бөхийн холбоо байгуулаад их спортоо хагалж бутаргаад яваагүй.
Манай тамирчид Инчоны азийн наадамд шигшээ 8-д шалгарч түүхэндээ хамгийн дээд амжилтаа үзүүлээд байгаа. Монголын сагсан бөмбөг шинэ түвшинд гарсныг олон улсад онцлох болсон. Улс эх орныхоо нэр хүндийг өргөөд ирсэн энэхүү баярт үйл явдлын үеэр С.Эрдэнэ сайд “манай тамирчид мундаг байна, би дэмжсэн” гэх утгатай зүйлийг хэвлэлээр ярьж байсан. Гэтэл үндэсний олимпийн хороонд явуулсан бичигтээ “Монголын сагсан бөмбөгийн холбооны багийг ямар ч тэмцээнд битгий явуул гэсэн шүүгчийн захирамж байсаар байтал та бүхэн Инчоний тэмцээнд явуулсан, байдал давтагдвал эрүүгийн хэрэгтэн болгоно шүү” гэж соёлтойгоор заналхийлсэн байна. Тэгэхээр сагсан бөмбөгт элэгтэй С.Эрдэнэ сайд шигшээ багаа Инчоны тэмцээнд амжилт гаргаад ирсэнд ихээхэн өширхөж байгаа бололтой.
Сагсан бөмбөгийн хаан байх шуналдаа шатаж хэрүүл маргаанаа шүүхэд өгч, шүүгч н.Энхцэцэг гэгч эрхэм “МСБХ” олон улсын тэмцээнд баг тамирчид явуулж болохгүй гэдэг шийдвэр гаргасан байх юм. Их хурлын гишүүн сайд хүн эрх мэдэл албан тушаалаараа далайлган их спортыг хүртэл шүүхээр мундагдуулж болдогийн жишээг ийнхүү яруу тодоор харуулж явна.
С.Эрдэнэгүй л бол Монгол Улсын шигшээ баг байх ёсгүй гэж үү? Өөрөө л биш бол өөр хэн ч биш гэсэн харалган зангаараа Улсынхаа шигшээ багийг олон улсын тэмцээнээс хасуулж байгаа түүнийг сагсан бөмбөгт сэтгэлтэй хүн гэх үү? Төрийн сайд хэрнээ гудамжны рекетчин шиг авирлаж дарамталж, сүрдүүлэх замаар тэрээр Монголын сагсан бөмбөгийг өөрийнхөө өмнө сөхрүүлэх л хүсэлтэй байгаа юм байх. С.Эрдэнэ бол сагсан бөмбөг гэж бид ойлгох хэрэгтэй юм байх. Тийм бол нэг мөсөн шигшээ багтаа ороод тоглочих хэрэгтэй. Бөндөгнөөд гүйж л байг. Эсвэл богино банзал, цацаг бариад хөгжөөн дэмжигч хийсэн ч болно шүү дээ. Нүдэнд харагдаж л байна.
Т.Цагариг
Сэтгэгдэл (85)