Төрийн ордны их танхимд зургаан цаг гаруй үргэлжилсэн ҮЗХ -ны хурлыг өнөөдөр үдээс хойш 14 цагаас үргэлжлүүлэн хуралдуулахаар шийдвэрлэлээ. Ийнхүү ойрын жилүүдэд чуулаагүй байсан АН -ын ҮЗХ -ны ээлжит бус 43 дугаар хурал нэлээд халуухан уур амьсгал дунд эхний өдрөө өнгөрөөлөө. Өчигдөр орой 18 цагт эхэлсэн уг хурал ширүүхэн өрнөж зарим гишүүд хоорондоо хэрэлдэж, нударга зөрүүлэх нь холгүй байсаар дууссан юм. Эхний өдрийн хурлаар ямартаа ч хурал удирдах хүмүүс болон тооллогын комиссоо байгуулж чадсан нь олзуурхууштай. Тиймээс дараагийн өдрийн хурлаараа хэлэлцэх гол асуудлуудаа баталж, шийдвэр гаргах л үлдлээ.