Олон жил хийгдээгүй байсан дуулиант ҮЗХ-ны хурал хоёр шөнө үргэлжлээд өндөрлөв. Гэхдээ ирэх долоо хоногт дахин хуралдана гэсэн болзолтойгоор шүү. Олон нийт АН-ын энэ хурлаас олон зүйлийг хүлээж байв. Олон нийтийн хүлээж байсан тэр зүйлүүдэд хариулт өгсөнгүй. Ард түмний хүлээж байсан зүйл бол АН-ын дарга Н.Алтанхуягийг хэвээр байлгах уу? өөрчлөх үү? Дараагийн Ерөнхий сайдад хэнийг дэвшүүлэх вэ? гэсэн хүлээлт байсан юм. Эдгээрийг ирэх долоо хоногт ярилцана гэж хойшлуулав. Эх сурвалжийн мэдээлж байгаагаар бол ирэх долоо хоногтоо амжиж Ерөнхий сайдад нэр дэвшигчийг тодруулна гэдэг эргэлзээтэй. Сая хурдан шийдсэн бол болох байсан. Одоо баахан өрсөлдөөн үүснэ. Тэр хирээрээ сунжирна. Тэгээд төрийн ажил гацаанд орох аж. Өнгөрсөн долоо хоногт УИХ Н.Алтанхуягийг огцруулах гэж байна. Огцруулахаар хэлэлцэж байна. Огцруулчихлаа гээд бараг ажил хийгээгүй. Ирэх 7 хоногт ч гэсэн Ерөнхий сайдад нэр дэвшигчийг ярьсаар байгаад хамаг цагийг өнгөрүүлнэ. Улсын төсөв, цаг үеийн асуудал, өвөлжилтийн бэлтгэл, отор нүүдэл гээд Монголын намрын олон ажил ил задгай үлдэхээр боллоо.

Хоёр өдөр үргэлжилсэн АН-ын ҮЗХ-гоор хамгийн чухал асуудлаа хэлэлцээгүй ч гэсэн найман гишүүнээ хөөхөөргүй шийджээ. АН дахь эх сурвалжийн мэдээлж байгаагаар бол найман гишүүнээ хөөхөөр санал хураах хуудас бэлдсэн байжээ. Мөн Р.Бурмааг хөөж Б.Мэдрээг гишүүн болгох гэсэн лобби ч хүчтэй явагджээ. Хурлыг даргалагч Э.Бат-Үүл үүнийг хүчтэй эсэргүүцжээ. ҮЗХ-ны гишүүд ч дэмжээгүй аж. Хэрэв Н.Алтанхуяг өөрөө хурлыг даргалсан бол санал хураалгаж бөөн юм болно гэж ярих хүмүүс олон байна.

Мөн МАХН-тай байгуулсан дуулиант гэрээгээ хүчингүй болгож. Их хурлаа хуралдуулахаар болж. Ийм л асуудлууд шийдэх гэж хоёр шөнө АН-ынхан бухимдав. АН-ын даргын асуудлыг шийдэж болох байсан ч гэсэн Алтангадас фракцийнхан давамгайлж байсан учир их хурлаараа хэлэлцэх нь бусдад ашигтай гэж үзжээ. Тэгэхээр АН дотор одоо их хурлын төлөөлөгч сонгох гэж аюул болно. Өөрсдийн хүмүүсээ сонгох гэж мөнгө тараах, луйвраар төлөөлөгч сонгох гэх мэт сонгодог аргууд үргэлжилнэ дээ. Энэ талаар нэлээн ч их маргаан өрнөнө дөө. Хамгийн сүүлд МАН-ынхан их хурлаа хийх гэж ийм жүжиг болсон. Тэр жүжиг одоо АН дотор өрнөх нь тодорхой боллоо. 

Сонирхолтой нь АН-ын ҮЗХ-ны хурал дууссаны дараа Н.Алтанхуягийн багийнхан "Хэзээ ч, хэзээ ч, хэзээ ч, хэзээ ч бүү бууж өг" гэсэн У.Черчиллийн хэлсэн үгийг хүч нэмэгдүүлэн өөр хоорондоо ярилцаж байсан гэнэ. Тэгэхээр тэд "хэзээ ч, хэзээ ч бууж өгөхгүй" гэсэн үзлээр асуудалд хандах бололтой. Эрх баригчдын энэ маргаан мэтгэлцээн төрийн ажлыг олон хоногоор хойш чангаах нь тодорхой боллоо.