Өнгөрөгч долоо хоногт Монгол Улсын Ерөнхий сайд Н.Алтанхуягийг огцруулснаар Монголын төрд урьд өмнө нүүрлэж байгаагүй нөхцөл байдал бий болж жинхэнэ гацаа үүслээ. Гэхдээ энэ бүх гацааны гол үндэс суурийг тавигч нь гүйцэтгэх засаглалын тэргүүн асан өнөөгийн АН-ын дарга хэвээрээ байгаа Н.Алтанхуяг юм.Тэрээр өөрийнхөө танхимд халаа, сэлгээ хийхээр санаачлага гаргаж энэ хүсэлтийнх нь дагуу УИХ-аас 2014 оны 10-р сарын 15-ний өдөр шийдвэр гаргаж 7 сайдыг үүрэгт ажлаас нь чөлөөлсөн. Ийнхүү 7 сайдыг чөлөөлөх шийдвэрийг гаргасан хэрнээ шинээр сайд нарыг томилоогүй нь Засгийн газрын 4 яамыг толгойгүй болгож орхисон юм. Монгол Улсын Засгийн газрын 13 яамны 4 нь сайдгүй бүтэн сарын нүүрийг үзэх гэж байна. Харин хуулийн дагуу үүрэг гүйцэтгэгчээр ажиллаж буй 10 гишүүнийг тэргүүн шадар сайд толгойлж байна. Хэдийгээр бүтцийн өөрчлөлтөөр 13 яамтай болсон ч хуучин 16 яамны ажилтнууд ажилдаа ирдэгээрээ ирж байгаа аж. Угтаа бол татан буугдсан яамдын хаягийг авч, байрыг дахин хуваарилж, ажилтнуудыг цомхогтон, газар хэлтсүүдийг шинээр зохион байгуулах ёстой.

    Гэтэл энэ үйл ажиллагаа явахаас өмнө Засгийн газар бүрэн бүрэлдэхүүнээрээ огцорсон. Засгийн газар дээр ийм ойлгомжгүй байдал бий болсон бол УИХ дээр ч мөн ойлгомжгүй байдал бий боллоо.Монгол Улсын 2015 оны төсвийг хэлэлцэж байх үед Ерөнхий сайд бүтцийн өөрчлөлтийн санал оруулж сангийн сайд Ч.Улааныг үүрэгт ажлаас нь чөлөөлсөн. Ийнхүү Монгол Улс анх удаа сангийн сайдгүй төсөв хэлэлцэж эхэлсэн. Ерөнхий сайд нь төсвөө өөрөө батлуулахаар УИХ-аар хэлэлцүүлэх явцдаа огцорлоо. Ингэснээр өргөн баригчгүй, эзэнгүй төсвийг УИХ-аар хэлэлцэж батлах болоод байна. Төсвийн тогтвортой байдлын тухай хуулиар УИХ хугацаандаа төсвөө баталж чадахгүй бол тарах заалттай. Гэтэл төсвийг өргөн барьсан Засгийн газар, сангийн сайд гэж алга. Тэгэхээр УИХ зөвхөн тарахгүйн тулд л 2015 оны төсвийг батлаад шинээр сонгогдсон Ерөнхий сайд нь тодотгол оруулж ирэхээр байдал бий боллоо. Нэг ёсондоо УИХ дараагийн Засгийн газар байгуулагдах хүртэл төсөв баталж тоглох нь. Ийм нөхцөл байдлыг удирдлагын чадамжгүй эрх баригчид бий болголоо гэхэд хилсдэхгүй биз ээ. Монголын төрд үүсээд байгаа эдгээр гацаан дээр Монгол Улсын Ерөнхий сайдыг шинээр томилох тухай асуудал нэмэгдэв. Огцорсон Ерөнхий сайд Н.Алтанхуяг үүрэг гүйцэтгэгчээр дахин томилогдохоор “хор найруулж” эхэлсэн нь улстөрийн хүрээнд цоо шинэ үзэгдэл байв.

    Ерөнхий сайдаасаа буусан ч намын даргын ажлаа өгөхгүй гэсээр тэрээр байдлыг улам ээдрээтэй болгож байна. Эрх мэдэл, албан тушаалаасаа үхэн хатан зууралдсан түүний хөлд Монголын төр л үрэгдэж, ард түмний эрх ашиг хохирч байна. АН-ын дүрэм ёсоор намын дарга Ерөнхий сайд байх ёстой. Гэтэл Н.Алтанхуяг намын даргын ажлаа өгөхгүй ирэх 12-р сард Их хурлаа хуралдуулна гэдэг шийдвэрийг ҮЗХ-ны хурлаараа гаргуулж дөнгөлөө. Тэгсэн энэ долоо хоногт багтаж ҮЗХ дахин хуралдаж Ерөнхий сайдад нэр дэвшигчийг тодруулахаар болов. АН-ын дүрмийн дагуу намын дарга Ерөнхий сайдын ажлыг хийхгүй гэвэл Ерөнхий сайдад нэр дэвшигчийг зөвхөн өөрөө л дэвшүүлэх эрхтэй гэнэ. Тэгэхээр Н.Алтанхуяг Ерөнхий сайдаасаа буусан ч намын дарга хэвээрээ үлдэж, дараагийн Ерөнхий сайд хэн байх вэ? гэдгийг шийдэхээр ийнхүү улайрч байна. “Алтангадас” “МҮДН” фракцийн тохироогоор дараагийн Ерөнхий сайд тодорно гэдгийг эх сурвалжууд мэдээллэж байгаа. Н.Алтанхуяг ҮЗХ-нд Ерөнхий сайдыг нэр дэвшүүлэх эрхтэй гэдэг дүрмийн тайлбараараа бамбай барьж дараагийн хүнтэйгээ тохироо хийж намын дарга хэвээр үлдэх арга сиймхийг эрэлхийлж байгаа нь илэрхий боллоо. Энэ бүхний цаана түүний 2017 оны Ерөнхийлөгчийн сонгуульд нэр дэвших амбиц бий. Бүтэн хоёр өдөр хуралдаж Ерөнхий сайдад нэр дэвшигчээ тодруулж чадаагүй АН-д Н.Алтанхуяг хаанчлалаа үргэлжлүүлэх боломж дуусаагүй байна. Учир нь түүний фракцийнхан ҮЗХ-нд олонх хэвээрээ байна.

    Мөн “МҮДН”-ний хүчтэй овгоруудтай гар нийлснээр Их хурлаа хайрцаглаж чадвал намын даргаараа үлдэх зураг түүнд хэдийн харагдаад эхэлчихсэн бөлгөө.

24tsag.mn