Эдийн засгийн хямрал засаглалын хямрал болж хувирлаа. АН-д Н.Алтанхуягаас өөр лидер байхгүй боллоо. АН-ын ҮЗХ-ныхон ингэж дүгнэжээ. Учир нь АН-ын ҮЗХ-ноос нэгэн сонин шийдэл гаргаж. Тэр нь дараагийн Засгийн газрыг хэрхэн байгуулах, ямар нам эвсэлтэй хамтрах, яаж зөвшилцөл хийх зэрэг асуудлаар тодорхой шийдэл гаргаж ҮЗХ-гоороо хэлэлцүүлэхийг Н.Алтанхуягт даалгажээ.  Бас УИХ дахь бүлэгтээ ч адилхан үүрэг өгч.

     Эндээс нэг зүйл ойлгомжгүй байгаа нь Н.Алтанхуяг АН-ын дарга учраас дүрмээрээ дараагийн Засгийн газрыг яаж байгуулах хэлэлцээрийг ахалж байгаа бололтой. Гэтэл тэр хэдхэн хоногийн өмнө  Ерөнхий сайдын суудлаасаа огцорсон. Тэгээд хэд хоногийн хойно дараагийн Засгийн газрыг ингэж байгуулья, ийм намуудтай хамтарья гэдэг асуудлыг ахалж ажиллах гээд байдаг. Ёстой ойлгоход сэтгэхүйн хурд хүрэхгүй. Дээр нь сөрөг хүчин болох МАН-ынхан Н.Алтанхуягтай хэлэлцээрт орох уу? Харин бие даагчид, “Шударга ёс” эвсэлийнхэн, ИЗНН-ынхан хамтарч байсан юм даа гээд саналыг нь хүлээн авах л биз. МАН-ынхан лав урилга заллагыг хүлээн авахгүй биз. Бид Н.Алтанхуяг гэдэг огцорсон сайдтай хэлэлцээрт орохгүй гэж ил тод зарлах байх. Эргэлзэж ядан байгаа МАН-ынхан Н.Алтанхуягаар далимдуулан засагт орохгүй ээ гээд зугтаж мэднэ. Эсвэл дараагийн засгийн газраа МАН-ыг оролцуулахгүйгээр байгуул гэж ҮЗХ-ноос нь өгсөн далд утгатай мессеж юм болов уу ? Тэгээд л МАН-ынхныг урихгүй, бухимдлыг нь төрүүлэхийн тулд Н.Алтанхуяг даргаа илгээчихэд хангалттай. Нөгөөдүүл л нь бухимдаад алга болчихно гэсэн мэргэн ухаан ч байж мэднэ. Өөрөөр хэлбэл Н.Алтанхуягаар МАН-ынхныг үргээх санаа байж болно.

    Ингэж бодвол төрийн ажилд ямар ч гацаа алга. Н.Алтанхуяг ахлаад дараагийн Засгийн газраа байгуулаад. МАН-ыг оролцуулахгүйгээр хэлэлцээрээ хийгээд явчихна. Тэр ингэж сэргэлэнтэж байгаад өөрийгөө ч Ерөнхий сайдад дахиад оруулаад ирж мэднэ. Ингэх ч хүсэл сонирхол бий. Учир нь өнгөрсөн тавь дахь өдөр Д.Тэрбишдагвыг Ерөнхий сайдын үүрэг гүйцэтгэгч болгосон нь буруу. Н.Алтанхуягийг болгох ёстой гэсэн асуудлыг хэлэлцэх гээд Төрийн байгуулалтын байнгын хороон дээр зарим гишүүд ирж суучихаад гарахгүй байгаа тухай мэдээлэл хэвлэлүүдээр баахан явав. Саарал ордноор ийм яриа их тарсан байсан. Хэрэв энэ үнэн бол Н.Алтанхуяг ч “задгай цагаан” биш “цайрсан цагаан” болжээ.

    АН-ын дүрмээр Ерөнхий сайдыг зөвхөн намынх нь дарга л нэр дэвшүүлэх эрхтэй гэж хоёргүй нэг утгаар өчигдөр хэвлэлийн бага хурал хийлээ. Тэгэхээр дараагийн Ерөнхий сайд Н.Алтанхуягаас шууд хамааралтай болж байна гэсэн үг. Түүнийг АН-ынх нь даргаас чөлөөлөхгүйгээр асуудал цаашаа явахад хүндрэлтэй боллоо. Огцоруулах их хурлыг хүлээнэ гэвэл хамгийн багаар бодоход сарын зай бий. Тэгж байтал огцоруулалгүй аваад үлдвэл бас яах уу? гээд асуудал бий. Улс орны байдал ч улам хүндрэх араандаа орлоо доо.