Өнгөрөгч амралтын өдрүүдэд АН-ын Үндэсний зөвлөлдөх хороо хуралдаж, Н.Алтанхуягийн МАХН-ын дарга Н.Энхбаяртай байгуулсан хоёр намын 2024 он хүртэл хамтран ажиллах гэрээг хүчингүй болгох шийдвэрийг гаргасан. Мөн шинэ Засгийн газрыг байгуулахдаа УИХ-д суудалтай бүх нам эвслийн бүлэгтэй зөвшилцөхөөр болсон гэдгээ мэдэгдсэн билээ.

Тэгвэл энэ талаар МАХН-ын Ерөнхий нарийн бичгийн дарга Г.Шийлэгдамба байр сууриа илэрхийллээ. Тэрбээр “АН-ын Гүйцэтгэх зөвлөлөөс намын дарга Н.Алтанхуягийг дээрх гэрээнд гарын үсэг зурж болно гэсэн эрх өгсөн байсныг ҮЗХ-ны хуралдаанаас хүчингүй болгосон болов уу. Ингэхгүй бол хүчин төгөлдөр үйлчлээгүй гэрээ шүү дээ. Засгийн газрыг унагасан асуудлыг хоёр намын байгуулсан гэрээтэй холбож, их мушгиж байна. Н.Энхбаяр дарга Монголдоо ирсэн нь Засгийн газрыг унагахад чиглээгүй юм шүү дээ. Намынхантайгаа дотоод асуудлаа ярилцах, Засгийн газарт хамтарч байгаагийн хувьд Монголоо хөгжүүлэхийн төлөө юу хийх боломжтой вэ гэдгийг ярьсан. Ер нь шинэ Засгийн газрыг байгуулахдаа УИХ-д суудалтай намуудтын төлөөлөлтэй ярилцана гэж байсан.  Тэгэхээр ажлын хэсэг нь асуудлаа оруулж ирнэ, бид тэр үед ярина” гэв.

Мөн тус нам УИХ-ын гишүүн Л.Цогийн асуудлыг авч хэлэлцээд түүнд хариуцлага тооцохоор болжээ. Л.Цогийг МАХН-аас хөөх шийдвэрийг албан ёсоор гаргаагүй ч хариуцлага тооцохоор болсон гэж тус намын Ерөнхий нарийн бичгийн дарга Г.Шийлэгдамба хэллээ.