Ерөнхий сайд Н.Алтанхуягийг огцруулснаар Шинэчлэлийн Засгийн газраас хийж, хэрэгжүүлж байсан бүх ажил царцчихлаа. Шинэчлэлийн Засгийн газар буруутай, яамдын сайд нар нь ч буруутай хэмээн дайрч давшлаад байсан “эх оронч” нар хаачив гэмээр таг чиг. Харин саарал ордонд жиргэж буй бор шувуудын хэлээр бол УИХ-ын дарга З.Энхболдыг буруутгаж шүүмжилсэн байр суурьтай гишүүд олон байгаа аж. Тэдний үзэж байгаагаар УИХ-ын дарга З.Энхболд хууль зөрчсөн тогтоол гаргаснаар төрийн ажил гацсан төдийгүй АН хагарч бутарч байна гэж буй. Тиймээс хууль зөрчсөн УИХ-ын дарга З.Энхболдод хариуцлага тооцох тухай асуудлыг зарим гишүүд намынхаа бүлэгт тавьж эхэлсэн гэх мэдээлэл түгж байна.