Ардчилсан намын ҮЗХ өнгөрсөн амралтын өдрүүдэд хуралдсан. Тэгвэл өнөөдөр тэрхүү хурлыг удирдаж явуулсан ИТХ –ын дарга Д.Баттулга, Сүхбаатар дүүргийн засаг дарга Д.Бадарсан, нийслэлийн Ардчилсан намын дарга Э.Бат – Үүл нар сэтгүүлчидэд мэдээлэл хийсэн юм. Энэ үеэр хурал даргалагчдын нэг ИТХ –ын дарга Д.Баттулгаас зарим зүйлийн талаар тодруулсан юм.
Д.Баттулга: ҮЗХ дээр гишүүд хоорондоо зодолдоогүй
АН –ын ҮЗХ –ны ээлжит хурал нэлээд ширүүн болсон сурагтай байсан. Гишүүд хоорондоо зодолдсон, бие биедээ халдсан гэсэн мэдээлэл яваад байгаа. Энэ үнэн үү?
-Тийм зүйл огт байхгүй гэдгийг хурал удирдан явуулсан хүнийхээ хувьд хэлье.
Засгийн газар байгуулах талаар бусад намуудтай зөвшилцөнө гэдгээ тайлбарлахгүй юу?
-ҮЗХ -ны гишүүд засгийн газар байгуулах болон Ерөнхий сайдын асуудлаар УИХ –д суудалтай намуудтай хамтарч ажил гэсэн үүргийг УИХ –ын АН –ын бүлэгт даалгасан. Гаргасан дүгнэлтийг ҮЗХ дахин авч хэлэлцэх болно.
-Намын дүрэм зөрчиж гэрээ байгуулсан намын даргад хариуцлага тооцох асуудлыг хэзээ ярих вэ?
-Намын даргад хариуцлага тооцох болон намын дотоод дүрэм зөрчиж гэрээ байгуулсан асуудлыг намын их хурал дээр ярилцах болно.
Найман гишүүнд хариуцлага тооцох асуудлыг яах вэ? Өчигдөр ерөнхий нарийн бичгийн дарга Ц.Оюундарь хэлэхдээ энэ асуудлыг нээлтэй үлдээн гэсэн.
Цаашдаа ҮЗХ -ноос гаргасан шийдвэрээр байна. Хяналтын ерөнхий хорооноос оруулж ирсэн тогтоолыг ҮЗХ -ны гишүүд дэмжээгүй. тэр хурлыг удирдаж явуулсан гурван хүний хувьд эцсийн бөгөөд үнэн дүгнэлтийг өнөөдөр та бүгдэд хүргэж байна.
Хууль зөрчиж дүгнэлт гаргасан Хяналтын ерөнхий хороондоо ямар нэгэн хариуцлага яагаад тооцохгүй байна вэ?
-Хяналтын ерөнхий хорооны асуудал бол ардчилсан намын асуудал. Тийм болохоор Намын их хурлаар энэ асуудлыг авч хэлэлцэнэ.