АН-ынхан  Ерөнхий сайдад нэр дэвшигчээ тодруулж чадахгүй байгаа нь улстөрд гацаа бий болголоо. ҮЗХ-ноос намын даргаа ирэх сард хуралдах их хурлаасаа сонгох шийдвэрт хүрч, харин Ерөнхий сайдад нэр дэвшигчийг намын бүлэг дээрээ хэлэлцэн тохирч ҮЗХ-нд дахин оруулж ирэх үүрэг өгсөн. Үүнийг АН-ын дарга Н.Алтанхуяг, Ерөнхий нарийн бичгийн дарга Ц.Оюундарь нар “Ерөнхий сайдад нэр дэвшигчийг намын дарга гүйцэтгэх зөвлөлд хэлэлцүүлж ҮЗХ-нд нэр дэвшүүлнэ, энэ эрх зөвхөн намын даргад бий” гэдэг тайлбарыг өгөөд байгаа бол хурлын тэргүүлэгчид болох Э.Бат-Үүл, Д.Баттулга нар “Ерөнхий сайдад нэр дэвшигчийг гүйцэтгэх зөвлөлөөс нэр дэвшүүлэх тогтоол орж ирснийг ҮЗХ-ны хурал дээр нухацтай хэлэлцээд АН-ын бүлэг нэр дэвшүүлэх нь зүйтэй” гэсэн шийдвэрт хүрсэн тухай тайлбарыг өгч байгаа юм.

    Ийнхүү шинэ Ерөнхий сайдыг зөвхөн намын дарга Н.Алтанхуяг л нэр дэвшүүлэх эрхтэй гэж мэтгэж байгаа “Алтангадас”-ынхан эсрэг фракцуудынхаа нэгдлийг удирдагч УИХ-ын дарга З.Энхболдыг огцруулахаар хөдөлж эхэллээ. Эх сурвалжуудын мэдээллэж байгаагаар “Алтангадас”-ын загалмайлсан эцэг гэгдэх Р.Гончигдорж нарын гишүүд З.Энхболдыг огцруулахаар Үндсэн хуулийн цэцэд маргаан үүсгэх өргөдлөө боловсруулаад байгаа гэнэ.

    Ийнхүү Ерөнхий сайдаасаа буусан Н.Алтанхуяг болон түүний багийнхан барилаа тавилгүй дараагийн Засгийн газарт нөлөөллөө хадгалж, намын даргын суудлаа авч үлдэх гэсэн тэмцлээс болж хэвийн тогтвортой үйл ажиллагаа явуулж байсан УИХ ч ганхахад хүрээд байна. “Унавал “хамтдаа унана шүү” гэсэн тэдний энэ улайралд Монголын төр чирэгдэж Засгийн газар хэзээ, хэрхэн байгуулагдах төсөв, мөнгөний бодлогоо яаж батлах нь улам тодорхойгүй болж байна.

    З.Энхболдыг огцруулах шалтаг нь Н.Алтанхуягийг Ерөнхий сайдаас огцруулахдаа түүний үүрэг гүйцэтгэгчээр шадар сайд Д.Тэрбишдагвыг томилсон явдал юм.  Монгол Улсын Үндсэн хууль болон, Засгийн газрын тухай хуулинд зааснаар Ерөнхий сайд огцорсон бол дараагийн Ерөнхий сайд томилогдох хүртэл үүрэг гүйцэтгэгчээр ажиллах ёстой. Харин өвчний учир, эсвэл нас барсан, бусад хүндэтгэх шалтгааны улмаас огцорсон ба чөлөөлөгдсөн Ерөнхий сайд үүрэг гүйцэтгэх боломжгүй бол Ерөнхий сайдын үүрэг гүйцэтгэгчээр тамхимын аль нэг гишүүнийг томилох хуультай.
    Урьд өмнө нь Ж.Наранцацралт агсныг Ерөнхий сайдаас огцруулахад Н.Туяа гишүүнийг Ерөнхий сайдын үүрэг гүйцэтгэгчээр томилж байсан. Ж.Наранцацралт агсан “би энэ мөчөөс эхлээд Ерөнхий сайдын үүргийг гүйцэтгэхгүй” гэж мэдэгдсэн учраас өөрийн хүсэлт буюу хүндэтгэх шалтаанд тооцож үүрэг гүйцэтгэгчээр танхимынх нь гишүүнийг томилж байсан ажээ. Мөн Ерөнхий сайд асан С.Баяр өвчний учир үүрэгт ажлаасаа чөлөөлөгдөхөд Н.Алтанхуяг түүний үүрэг гүйцэтгэгч болж байв. Үүнээс өөр бүх тохиолдолд Ерөнхий сайдын үүрэг гүйцэтгэгчээр өөр хүн томилж байгаагүй юм.

    УИХ-ын дарга З.Энхболд хуулинд заасан тодорхой нөхцлүүд үүсээгүй байхад шадар сайд Д.Тэрбишдагвыг үүрэг гүйцэтгэгчээр томилуулах тогтоол батлуулсанд эгдүүцэж Н.Алтанхуяг буцаад үүрэг гүйцэтгэгч болох оролдлого хийж явсан нь Монголын түүхэнд анхны тохиолдол болсон.

    УИХ-ын даргыг хэн нэгэн албан тушаалтан, намын бүлэг, гишүүдээс санал оруулж огцруулдаггүй. Уг байгууллага нь Үндсэн хуулийн дагуу өөрөө тогтвортой байгууллага. Харин УИХ-ын даргыг огцруулах цөөн хэдэн үндэслэл байдгийн нэг нь Үндсэн хууль зөрчсөн тохиолдолд УИХ дээр нууц хуралтаар шийдэх явдал билээ. Ийнхүү АН, Засгийн газрыг тойрч байсан бужигнаан УИХ-ын даргыг хөмөрч хөл, толгой эцэс төгсгөл нь мэдэгдэхгүй засаглалын хямрал нүүрлэхэд ойрхон тулж ирлээ.

    Өнгөрөгч долоо хоногт энэхүү тогтоолоос болж УИХ-ын тамгын газарт багагүй маргаан дэгдсэн гэнэ. Н.Алтанхуяг бодлогогүй алхам хийсэн А.Бакейгаа барьж идэх шахаж алдаагаа залруулан буцаагаад үүрэг гүйцэтгэгчээр нь тавихыг шаардсан гэнэ. Харин төрийн байгуулалтын байнгын хороо, УИХ-ын тамгын газрынхан энэ бүхний хариуцлагыг тус байнгын хорооны нэгэн референтэд үүрүүлж байгаа сурагтай.

    З.Энхболд үндсэн хууль зөрчсөн үү гэдэг асуудал өөрөө бас маргаан дагуулж байгаа юм. Учир нь УИХ-ын нэгдсэн чуулганд аливаа саналын томьёлол, тогтоолын төслийг зөвхөн байнгын хорооны гишүүдийн дэмжлэг авсан хэлбэрээр оруулж ирдэг. Тиймээс төрийн байгуулалтын байнгын хорооны тогтоолын төслийг УИХ-ын дарга дур мэдэн өөрчлөх эрхгүй юм. Эцэстээ Н.Алтанхуягийн ойрын хүн “Алтангадас”-аар овоглогч, төрийн байгуулалтын байнгын хорооны дарга А.Бакей энэ тогтоолын төслийн буруутан болж байгаа юм. Мөн өөрөө хуулиа мэдэхгүйгээсээ болж үүрэг гүйцэтгэгчдээ тамгаа хадаг яндартай өгчихөөд гэнэт ухаан орсон юм шиг А.Бакей З.Энхболд надруу дайрч байгаа Н.Алтанхуягийг  задгай алхамын алдаа гэлтэй. Түүний 33 зөвлөх дотроос хэрэгтэй зөвлөгөөг нь өгчих ганц ч хүн олдоогүй нь харамсалтай.  Одоо нэгэнт л УИХ-аар алх цохисон болохоор ямар ч арга байхгүй. Гэтэл УИХ-ын гишүүн Н.Алтанхуяг Ерөнхий сайдын өрөөнд дур мэдэн орж, ширээн дээр нь суугаад мэдэгдэл хийгээд сууж байх ажээ.