АН-ынхан хоёр том хэсэгт хуваагдлаа. Нэг талд МоАХ, МҮДН, Шонхор гэсэн фракциуд гарав. Нөгөө талд Нэг ардчилал, Алтангадас хоёр нэгдэв. Ингээд өчигдөр МоАХ, МҮДН, Шонхор гэсэн гурван фракци нэгдэж ч хуралдав. Тусдаа ч хуралдав. Ерөнхий сайдад Р.Амаржаргалыг дэвшүүлэх нь зүйтэй гэж тохиров. Алтангадас, Нэг ардчилал хоёр нэгдэж ярилцаад Ч.Сайханбилэгийг Ерөнхий сайдад нэр дэвшүүлэхээр болов. Ингээд Ч.Сайханбилэг, Р.Амаржаргал гэсэн Ховдын хоёр эрхэм дээр санал хураах нь тодорхой болов.

    Р.Амаржаргалыг Ерөнхий сайдад нэр дэвшүүлэхээр болсон тухай мэдээлэл хэвлэлээр маш хурдан тарав. Н.Алтанхуягийг ихэд сандаргав. Өчигдөр орой яаран сандран мэдээлэл хийв. Тэрээр "Манай намын дүрмээр намын дарга АН-ын Гүйцэтгэх зөвлөлтэй зөвшилцөж Ерөнхий сайдад нэр дэвшүүлэх хүнийг ҮЗХ-нд оруулах учиртай. Шинэчлэлийн Засгийн газраа дэмжиж, АН-ынхаа дүрэм журмыг тууштай баримталж ирсэн УИХ-д байгаа АН-ын гишүүдээс Ерөнхий  сайдад нэр дэвшүүлнэ. Харин Засгийн газрыг огцруулах асуудлыг дэмжсэн УИХ-д байгаа АН-ын гишүүдээс би намын даргын хувьд Ерөнхий сайдад хэнийг нь ч нэр дэвшүүлэхгүй" гэж зарлав. Эндээс дүгнэж үзвэл МоАХ, Шонхор, МҮДН гурвын нэгдэж санал болгож байгаа Р.Амаржаргалыг АН-ын даргын хувьд Н.Алтанхуяг дэмжихгүй гэдгээ ил тод зарлаж байна. Яагаад гэвэл Р.Амаржаргал түүний эсрэг ажилласан. Н.Алтанхуягийг огцруулах кноп дарсан. Энэ шалгуураар хандвал Х.Баттулга гэх мэт хүчирхэг эрхмүүд бүгд Ерөнхий сайдад нэр дэвших эрхгүй болно гэсэн үг л дээ. Тэгэхээр дараагийн Ерөнхий сайдад нэр дэвших хүн Н.Алтанхуяг гэдэг хүний шалгуураар орох болчихоод байдаг.

    Гэтэл өнгөрсөн амралтын өдрүүдэд хуралдсан ҮЗХ-ны хурлаас дараагийн Ерөнхий сайдад нэр дэвшүүлэх хүнийг УИХ дахь АН-ын бүлэгт үүрэг болгосон. Гэтэл АН-ынхан хэвлэлийн бага хурал хийхдээ намын дарга, УИХ дахь намын бүлэг хоёр ийм үүрэг өгсөн гэж зарласан. Н.Алтанхуяг намын дүрмээр би дараагийн Ерөнхий сайдыг санал болгох эрхтэй гэж зарлаж байна. Ингээд бодоод үзвэл АН дотроо ихээхэн том маргааны эхлэлийг тавьчихлаа. Бүх асуудлыг огцорч байгаа Н.Алтанхуяг мэдэж, хэнтэй хэлэлцээр хийхийг шийдэж, хэнийг Ерөнхий сайд болгохоо зарлана гэвэл бүтэшгүй зүйл болно. Монголчууд "явах хүнээр ачаа бүү татуул" гэдэг дээ. Гэтэл АН-ын огцорч байгаа Ерөнхий сайд дараагийн ачааг татна гэж зүтгээд байгаа нь ихээхэн эргэлзээ гайхширлыг төрүүлнэ. Тэрээр бусад намуудтай зөвшилцөх ажлын хэсгийг байгуулчихаад өөрөө ахлаад яваа бололтой. Н.Алтанхуягтай МАН хэлэлцээрт орохгүй гэж зарлах байх. Тэгэхээр Н.Алтанхуяг хэлэлцээр хийх бүрэн эрхтэй гэж АН-ынхан үзвэл нөгөө бие даагч гурав, ИЗНН-ын хоёр, "Шударга ёс" эвсэлийн 11-тэй хэлэлцээрт орох нь тодорхой боллоо. Тэдний бараг тал хувь нь Н.Алтанхуягаас уравсан. Тэгэхээр тэд Н.Алтанхуягийн шалгуурт тэнцэхгүй. Н.Алтанхуяг маш цөөхөн хүнтэй учраа олох бололтой. Ингээд Засгийн газраа байгуулна гэж үзвэл бараг Ерөнхий сайд нь томилогдож чадахгүй ч байж мэднэ. Томилогдлоо гэхэд нэг сарын нас ч хүрэхгүй. Ийм л хэврэг Засгийн газар байгуулахаар Н.Алтанхуяг хөдөлж эхэллээ. Түүний эсрэг МоАХ, МҮДН, Шонхор гурав нэгдэж хөдөлнө. АН дотор дараагийн Ерөнхий сайд аль бүлэглэлийн хүн байх вэ гэсэн тулаан эхэллээ. Нэг ардчилал, Алтангадас хоёр фракцийн гишүүд хэд вэ? МоАХ, МҮДН, Шонхор гурвынх хэд болох вэ? гэдгээс бүх асуудал шийдэгдэнэ. Гэхдээ фракцаасаа урваж хөрвөх гишүүд ч байгаа сурагтай. Тэднийг нэмж, хасаад л нийлбэр нь гарна даа.