МАХН-ын зүгээс Л.Цог даргад хариуцлага тооцож намаасаа хөөх гэж байна гэх мэдээлэл солшиол ертөнцөөр түгсэн. Энэ нь Л.Цогийн намын дүрмийн зөрчиж, удаа дараа намынхаа эсрэг үйл ажиллагааг явуулсантай холбоотой гэдгийг ч эх сурвалжууд дурдаад байсан.
Тэгвэл УИХ-ын дэд дарга Л.Цог энэ талаар байр сууриа илэрхийлжээ. Тэрбээр “Би хэдийгээр МАХН-аас нэр дэвшсэн ч УИХ-д тойргоос сонгогдсон. Гишүүн байх мандатыг Орхон аймгийнхан, Эрдэнэт хотынхон надад өгсөн. Хоёрт, УИХ-ын гишүүний бүрэн эрхийн том баталгаа надад бий. Тэр нь УИХ дээр өөрийн гэсэн байр суурьтай, үзэл бодолтой байх. Хүн гүтгэх, доромжлохоос бусад дээр хариуцлага хүлээхгүй гэсэн ганц баталгаа бий. Ийм хүнийг намын жирийн гишүүнтэй адилтгаж “Намын үг сонссонгүй” гэж байгаа бол би хүлээж авахгүй. Ядаж намын шийдвэр нь хууль ёсны байсан бол хамаа алга. Өмнө нь бол МАХН нийгмийг удирдан чиглүүлэгч байсан. Харин 1990 оны гуравдугаар сараас хойш энэ лоозонг аваад хаячихсан. Гэвч тэр үеийн арга барил ухамсар хэвээр байж болохгүй. Төрийн дээр нам гардаг, төртэй нам зэрэгцдэг, төрийг нам удирддаг гэсэн Үндсэн хуулиас өмнөх юм одоог хүртэл салж өгөхгүй байгаа нь харамсалтай” гэжээ.