Монгол Улсын Засгийн газар огцорсон нь олон улсын хэвлэлийнхэний анхаарлыг багагүй татсан. Аливаа улсад улстөрийн тогтворгүй байдал бий болох нь хөрөнгө оруулагчдад туйлын таагүй мэдээ болон тусдаг. Сүүлийн 24 жилд ОХУ-д дөрөв, БНХАУ-д гурван Засгийн газар солигдсон бол бид 13 дахь Засгийн газраа байгуулах гэж байна.  Шинэчлэлийн Засгийн газрыг огцруулбал эдийн засгийн нөхцөл байдал сайжрахгүй, гадаадын хөрөнгө оруулагчид улам дүрвэж гарна гэсэн шүүмжлэл маш ихээр явж байсан. Ерөнхий сайд Н.Алтанхуягийг огцруулсны дараах хэдэн өдөрт Монголын гэх тодотголтой компаниудын олон улсын зах зээл дээрхи хувьцааны ханш огцом унаад байсан. Гэвч шинэчлэлийн Засгийн газрыг огцруулсан нь эдийн засагт улам таагүй байдлыг бий болгоно гэсэн шинжээчдийн дүгнэлт энэ удаад алдав бололтой. Гадаадын хөрөнгө оруулагчид Монгол Улсын засгийн газар алдаатай бодлого явуулж ирснийг онцолж, чадваргүй удирдагчидаа сольсон нь харин ч оносон хэрэг болсон гэсэн мэдээллийг түгээх боллоо.

    Тухайлбал хамгийн сүүлд л гэхэд Монголд хамгийн том хөрөнгө оруулагч, дэлхийн уул уурхайн хоёр дахь том гегант Рио Тинто группын Ерөнхийлөгч Сем Уолш өнгөрөгч ням гарагт Бээжин хотноо болсон АПЕК-ийн эдийн засгийн салбар форумын индэр дээрээс дэлхий тэргүүлэгч хөрөнгө оруулагчдад хандан “Н.Алтанхуягийн Засгийн газар огцорсон нь хөрөнгө оруулагчдын хувьд сайны дохио” гэдгийг ил цагаанаар мэдэгдэж орхилоо.

    Тэрээр “Монгол Улсын Засгийн газрын тэргүүн өөрчлөгдөж байгааг Оюутолгой төслийг гацаанаас гаргах боломж гэж харж байна. Би үүнийг эерэг шинж тэмдэг байх болно гэдэгт итгэлтэй байна. Монгол Улсын Засгийн газрын шинэ төлөөлөгчтэй гэрээгээ үргэжлүүлэн хэлэлцэхдээ таатай байх болно. Би Оюутолгойн төслийг үргэлжлүүлэхийг тэсэн ядан хүлээж байна. Ажил хугацаандаа явагдахад би дуртай, гэвч Монгол эрх баригчдад энэ асуудлаа цэгцлэх хугацаа хэрэгтэйг ойлгож байна. Бид хүлээх болно” гэж ярьжээ. “Рио Тинто” Оюутолгой төслийн хоёр дахь үе шат болох гүний уурхайн өргөтгөлийн ажилд хэрэглэх 5.4 тэрбум ам.долларыг Монголын Засгийн газраас шаардаж байгаа бөгөөд оноос өмнө санхүүжилт өгөхгүй бол ажлыг үргэлжлүүлэхгүй гэдгээ өнгөрсөн сард мэдэгдсэн билээ.  

     Ийнхүү манай хамгийн том түнш маань Монголд үүсээд байгаа улстөрийн тогтворгүй байдлыг эерэг үзэгдэл гэж хэлсэн нь хөрөнгө оруулагчдад итгэл найдвар өгсөн явдал боллоо гэж барууны хэвлэл мэдээллийнхэн онцолж байна.

    Үүнээс үзэхэд эрх баригчдын хэлж ярьж байсан шиг Оюутолгойн төсөл гацсан, гадаадын хөрөнгө оруулалт буурсан, эдийн засаг унасан зэрэг шалтгаанууд нь Н.Алтанхуягаас урьд өмнө авч хэрэгжүүлж байсан бодлого, гадаад орчноос шалтгаалсан зүйл биш харин шинэчлэлийн Засгийн газрын алдаа бодлого байсан гэдгийг нотолсон явдал боллоо.

    Дараагийн Засгийн газар хэрхэн байгуулагдах, хамгийн том хөрөнгө оруулагчтайгаа яриа хэлэлцээрт хүрч Оюутолгойн төслийг урагшлуулж чадах эсэхээс гадаадын хөрөнгө оруулалт, эдийн засгийн сэргэлтийн хувь заяа хамаарч байна.