УИХ дахь Ардчилсан намын бүлэг өнөөдөр 10 цагаас Төрийн ордны “А” танхимд хуралдаж Ерөнхий сайдад нэр дэвшигчээ тодруулах гэж байна. Уг асуудлыг өчигдөр 13 цагаас хэлэлцэх ёстой байсан ч “Алтангадас” фракцийн гишүүд хуралдаа ирээгүй учраас хэлэлцэх асуудлын дараалалд  өөрчлөлт оруулж, хойшлуулсан юм. Эцэст нь бүлгийн гишүүд энэ асуудлаар Монгол Улсын Ерөнхийлөгчтэй зөвшилцөх нь зүйтэй гэж үзсэн учраас бүлгийн хурлаа түр хойшлуулсан. Тэд орой нь АПЕК –ын дээд хэмжээний хуралд оролцоод эх орондоо ирж буй Ерөнхийлөгч Ц.Элбэгдоржийг “Их тэнгэр” –т тосч уулзсан гэнэ.
           Ерөнхийлөгч "Намын дотоод хэрэгт оролцохгүй гэдгээ мэдэгдсэн бөгөөд ардчилсан зарчмаар олонхийн саналыг авсан хүнийг дэмжих болно" илэрхийлжээ. Ерөнхий сайдад УИХ –ын гишүүн Д.Ганбат, Р.Амаржаргал, Ч.Сайханбилэг нар нэр дэвшээд байна. Тэд өнөөдөр бүлгийн гишүүддээ “Эдийн засгийг ямар хугацаанд хямралаас гаргах вэ” гэсэн мөрийн хөтөлбөрөө танилцуулна. Үүн дээр үндэслэн нууц санал хураалтаар Монгол Улсын 28 дахь ерөнхий сайдад нэр дэвшигчийг тодруулна.