УИХ дахь Ардчилсан намын бүлэг хоёр өдөр хуралдсаны эцэст Ерөнхий сайдад УИХ-ын гишүүн Р.Амаржаргалыг нэр дэвшүүллээ. Гэхдээ өнөөдрийн хуралдаанд Ерөнхий сайд асан, АН-ын дарга Н.Алтанхуяг тэргүүтэй Алтангадас фракцийнхан оролцоогүй юм. Мөн нэр дэвшсэн Ч.Сайханбилэг ч хуралд оролцоогүй байна. Харин Д.Ганбат гишүүн нэрээ татжээ. Ингээд АН-ын бүлгийн 35 гишүүнээс 27 нь санал хураалтанд оролцож бүгд Р.Амаржаргалыг дэмжлээ.  Мөн хуралдааны үеэр Р.Амаржаргал  нийгэм эдийн засгийн өнөөгийн байдал, эдийн засгийн хямралаас хэрхэн гарах талаар танилцуулсан байна. Бүлгийн хурлын дараа бүлгийн дарга Д.Эрдэнэбат сэтгүүлчдэд мэдээлэл өглөө. Тэрээр Р.Амаржаргалын талаар “Улс орныг эдийн засгийн хямралаас гаргаж чадах чадварлаг хүнээ сонголоо” гэв.

ҮЗХ-ны хурлаар шинэ Засгийн газрыг байгуулах,  Ерөнхий сайдыг тодруулах эрхийг АН-ын бүлэгтээ өгсөн. Тиймээс бүлэг Ерөнхий сайдаа тодруулж дараа нь намын дарга Н.Алтанхуяг ҮЗХ-ны хуралдаанаар оруулах юм байна. ҮЗХ ойрын хугацаанд хуралдаж  шинэ Ерөнхий сайдыг хэлэлцэх аж. Бүлгийн дарга Д.Эрдэнэбат “энэ саналыг парламентад суудалтай намуудтай зөвшилцөнө” гэлээ.

Уг асуудалтай холбогдуулан түүнээс зарим зүйлд тодруулга авлаа.

-Ардчилсан намын дарга яагаад бүлгийн хуралдаанд ирээгүй вэ? Ямар нэгэн шалтгааныг хэлсэн үү?

- Тэр шалтгааныг мэдэхгүй. Бүлгийн олонхи ирсэн учраас хуралдаж шийдвэрээ гаргалаа

- Намын шийдвэр ҮЗХ дээр унавал яах вэ?

- Тэрийг би хэлж мэдэхгүй байна. Ийм явдал болохгүй байх гэж бодож байна.