Ардчилсан намын дарга Н.Алтанхуяг намынхаа эсрэг кноп дарсан урвагч нарыг дэмжихгүй гэдгээ мэдэгдсэн билээ. Тэгвэл өдгөө ч энэ байр суурин дээрээ хатуу зогсож байгаа бөгөөд тус намын дүрэмд ч энэ талаар тодорхой заасан байдаг аж. Тодруулбал, АН-ын “Үндсэн дүрэм”-ийн 6.8.2.6 дээр “Намын дарга нь Ерөнхий сайдад нэр дэвшүүлэх саналыг Гүйцэтгэх Зөвлөлтэй зөвшилцөн ҮЗХ-ийн хуралдаанд оруулна” хэмээн заажээ. Мөн “Улс төрийн албан тушаалд нэр дэвшүүлэх журам”-ын 2.1.1-д Төрийн сонгуульд АН олонх суудал авсан тохиолдолд Намын Даргыг Ерөнхий сайдад, анхан ба дунд шатны ИТХ-д олонхи суудал авсан АН-ын даргыг тухайн шатны Засаг даргад нэрийг нь дэвшүүлнэ. Намын дарга тухайн шатны намын хорооны дарга хүндэтгэн үзэх шалтгаанаар нэр дэвшихээс татгалзсан тохиолдолд дараагийн нэр дэвшигчийг тухайн шатны намын даргын санал болгосноор ҮЗХ, НнЗХ, ДшНХ-оо авч хэлэлцэнэ гэжээ. Өөрөөр хэлбэл намын дарга Гүйцэтгэх зөвлөлтэй зөвшилцсөнөөр нэг хүний нэрийг ҮЗХ-д санал болгодог дүрэмтэй аж. Тиймээс АН-ын дарга Н.Алтанхуяг бүх процессыг дүрмийн дагуу явуулна, урвагчийг дэмжихгүй гэдгээ илэрхийлсэн байна.