АН-ынхан нэгэн цагт Н.Алтанхуягийн төлөө амиа өгөхөд ч бэлэн байсан даа. Харин одоо бүгдээрээ Н.Алтанхуягаас нүүр буруулж байна. Н.Алтанхуягийг хамгийн их хамгаалж байсан гишүүд ч Н.Алтанхуягт "баяртай" гэж үг, үйлдлээрээ хэлж эхэлээ. Даан ч Н.Алтанхуяг тэднийхээ үйлдэлд итгэж чадахгүй зовох боллоо.

Хамгийн сүүлд УИХ дахь АН-ын бүлгийн дарга Д.Эрдэнэбат Ерөнхий сайдын суудлаас бууж шокноосоо гараагүй байгаа Н.Алтанхуяг даргыгаа сайхан тонгорлоо. Уг нь Д.Эрдэнэбат дарга Н.Алтанхуягийг огцруулах байнгын хороон дээр эсрэг санал өгч байсан. Түүнийгээ "Кноп андуурчихлаа. Би хэзээ ч тэгэх хүн биш. Миний байр суурь анхнаасаа тодорхой байсан. Хэвлэлийнхэн улс төржүүлэх хэрэггүй" гэж олон тайлбарласан даа. Үнэндээ бол тэрээр Н.Алтанхуягийг огцруулах асуудалд далдуур оролцсон гэдгээ өчигдөр баталж орхилоо. Тэрээр өчигдөр бүлгийн хурлаа зарлан хуралдуулав. Хурлыг хойшлуулахыг Н.Алтанхуяг олон удаа гуйсан гэсэн яриа ордноор таржээ. Харин Д.Эрдэнэбат зөвшөөрсөнгүй. Хурлаа явуулаад Н.Алтанхуяг даргынхаа эсрэг шийдвэрийг гаргачихав. Тэгээд "Улс төрийн ажил бүлгийн хуралдаанаар хамаарч байгаа учраас бид хариуцлагатай ажилласан. Р.Амаржаргалыг нэр дэвшүүлж байгаа нь улс орноо эдийн засгийн хямралаас хамгийн богино хугацаанд гаргаж чадах учраас санал нэгдсэн" хэмээн тайлбар хийсэн юм. Тэр бүү хэл сэтгүүлчид түүнээс хэдэн асуулт асуухад Н.Алтанхуягийг хэрхэн доош нь хийснийг харж болно.

Сэтгүүлч: Намын дарга Н.Алтанхуяг ямар шалтгаанаар бүлгийн хуралдаа оролцоогүй юм бэ?

Д.Эрдэнэбат: Тэр шалтгааныг бид мэдэхгүй байна. Бүлэг 35 гишүүнтэй, бүгд ижил тэгш эрхтэй. Энэ утгаар бүлгийн гишүүдийн олонх ирсэн бол хуралдаан үргэлжлэх дүрэмтэй.

Сэтгүүлч: Засгийн газрыг огцруулах эсрэг санал өгсөн гишүүдээ яах юм?
Д.Эрдэнэбат: Тэрийг манай намын даргын байр суурь гэж үзэж байгаа. Өнөөдрийн бүх асуудлыг бүлгийн дүрмийн хүрээнд асуудлаа шийдээд явж байгаа.

Эндээс хэд хэдэн тодорхой зүйл харагдаж байна. Нэгдүгээр Н.Алтанхуяг бүлгийн гишүүдийн нэгэн адил ирэх ёстой байсан. Тэр бусдаас давуу эрх эдлэх цаг нь өнгөрсөн гэж соёлтойгоор хэлжээ. Хоёрдугаарт найман гишүүнийг хөөх асуудал Н.Алтанхуягийн л санал байсан шүү дээ. Бидэнд тийм бодол анхнаасаа байгаагүй гэж далдуур хэлжээ. Өөрөөр хэлбэл, АН-ын бүлгийн дарга Д.Эрдэнэбат нэгэн цагт хамгаалж өмгөөлж ирсэн Н.Алтанхуягаасаа хамгийн түрүүнд нүүр буруулжээ. Түүнд Р.Амаржаргал илүү ирээдүйтэй бас Ерөнхий сайд болох магадлалтай учраас ийм сонголт хийж байх шиг байна.

Бас Н.Алтанхуягтай нэг баг болж ажилласан хүн бол Ерөнхий нарийн бичгийн дарга Ц.Оюундарь. Тэрээр өчигдөр цахим хуудаснаа "Ардчиллын зарчмаар цөөнх нь үзэл бодлоороо тэмцдэг ч ялагдвал олонxийн шийдвэрээ дагадаг. Үүнийг мөрддөггүй xүн хэр удаан тэсэх бол гэж эмээнэ" хэмээн байр сууриа илэрхийлсэн юм. Хэнийг ингэж хэлсэн байх вэ? Ялагдчихаад, олонхийн шийдвэрээ дагаж чадахгүй байгаа Н.Алтанхуягаа хэлсэн болов уу гэж улс төр судлаачид дүгнэж эхлэв. Тэгээд ардчилалын зарчимаа биелүүлэхгүй энэ хүн хир удаан тэсэх болоо? гэж асууж байгаа нь анхаарал татна. Одоогийн байдлаар олонхийн шийдвэрээ дагаж чадахгүй, гүрийж байгаа хүн бол бас Н.Алтанхуяг л байна. Гэхдээ Ц.Оюундарь дарга Н.Алтанхуяг гэж цохож хэлээгүй. Битүү хатуу утгатай зүйлийг л бичсэн. Утга санааг нь дүгнэж үзвэл Н.Алтанхуяг даргаа л хэлсэн бололтой. Ингэж дүгнэж үзвэл Н.Алтанхуягтай хамгийн ойрхон байсан Ц.Оюундарь хүртэл бодит байдалтай эвлэрэхийг даргадаа зөвлөж байгаа бололтой.

Ийнхүү Н.Алтанхуягийн төлөө байсан гишүүд, намын нөхөд нь өдөр бүрээр л алсарч байна. Улс төр л юм даа. Одоо Н.Алтанхуягийг асуудалтай, авлигатай тэмцэх газрын овоо хараанд өртсөн өнөөх дуулиантай, нэр сүр нөлөөлөл багатай хэдэн зөвлөхүүд нь хүрээлэн үлдэж байгаа бололтой. Бас нөлөөллөө өдөр бүрээр алдаж байгаа Алтангадас фракцийнхан байгаа. Алтангадас зүг чигийг заахаа больж байгаа бололтой.