МАХН – МҮАН –ын “Шударга ёс эвсэл” –ийн бүлгээс ирэх оны төсвийн тухай, нийгмийн даатгалын сангийн 2015 оны төсвийн тухай, хүний хөгжил сангийн 2015 оны төсвийн тухай хуулийн төслүүдийн талаар санал, дүгнэлт гаргажээ.
Тэрхүү санал, дүгнэлтэдээ:
1.    Монгол улсын 2015 оны нэгдсэн төсвийн төсөлд баримталсан Засгийн газрын төсөв, санхүүгийн бодлого нь улс орны эдийн засгийг тогтворжуулах, хүндрэлийг гэтлэн давах, хөгжлийг дэмжих зорилгод нийцээгүй, учир дутагдалтай байна.
2.    Бүтээгдэхүүн хуваах гэрээний дагуу газрын тосны борлуулалтаас төсөвт төвлөрүүлэх орлогыг нэмэгдүүлэх талаар Засгийн газарт чиглэл өгч, холбогдох гэрээг шинэчилж, рояалти буюу нөөц ашигласны төлбөрийг 10-15 хувь болгох. Ингэснээр улсын төсөвт 70 -аас 100 тэрбум төгрөгөөр нэмэгдүүлэх боломжийг бүрдүүлэх.
3.    Татварын орлогын дутуу төлөлт, нуун дарагдуулсан зөрчлийг бүрэн барагдуулах, татварынхны үгсэн хуйвалдаж төлүүлэхээс үндэслэлгүйгээр чөлөөлсөн асуудлыг таслан зогсоох, хариуцлага тооцох /130 сая ам долларын зөрчлийг 30 сая ам.доллар болгож бууруулсан, татварын ерөнхий газар, дүүргийн татварын хэлтсийн  дарга нар шагнал нэрээр төсвийн мөнгө хувьдаа завшсан/ зэрэг зүйлүүдийг тусгажээ.
           Ийнхүү өчигдөрхөн төсвийн тухай хуулийн төслийг чимээгүйхэн дэмжиж суусан “Шударга ёс” эвслийн бүлэг засаг огцрох чимээнээр өөрсдийн байр сууриа огцом өөрчилжээ. Тэд хамгийн эмзэг сэдэв болох уул уурхайгаар тэр дундаа “Оюутолгой” –той холбоотой татварын асуудлаар Засгийн газрыг сүрдүүлж эхэлсэн бололтой.