Өнөөдөр 17:00 цагаас хаалттай эхлэх АН-ын ҮЗХ-ны хурлаас Монгол Улсын 28 дахь Ерөнхий сайд тодорно. УИХ-дахь АН-ын бүлгээс УИХ-ын гишүүн Р.Амаржаргалын нэрийг дэвшүүлээд байгаа.

    Харин үүнийг нь намын хяналтын хороо нь дүрмийн бус гэж үзэж мэдэгдэл хийсэн. Үүний цаана “Р.Амаржаргалыг хэзээ ч дэмжихгүй “гэж шазуур зуун зууралдаж байгаа Н.Алтанхуягийн намын даргын суудлаа авч үлдэх гэсэн тэмцэл бий. Тийм учраас ҮЗХ-ны хурал дээр Н.Алтанхуяг дараагийн Ерөнхий сайдад Р.Амаржаргалыг дэвшүүлэхгүй байхын төлөө бүх хүчээ дайчлах нь тодорхой болоод байна.

    Эх сурвалжуудын мэдээллэж байгаагаар Р.Амаржаргалыг ҮЗХ-ны хурлаас тийм ч амархан Ерөнхий сайдад нэр дэвшүүлэхгүй бололтой. ҮЗХ-ны нийт 228 гишүүнээс 80 орчим нь “Алтангадас”-ын мандаттай. Тэд ҮЗХ-ны хурал дээр үргэлж олонхи болсоор ирсэн хүчирхэг зохион байгуулалттай фракц. 2012 оны сонгуулийн дараа бялуу хуваарилахад “Алтангадас”-ынхан төрийн захиргааны албан тушаалаас илүүтэй төрийн өмчит компани,  үйлдвэрийн газруудад хүмүүсээ хуваарилсан нь ҮЗХ-н дахь нөлөөллөө хадгалж үлдэх гэсэн бодлогын шинжтэй алхам байсан ажээ.

    ҮЗХ-ны хуралдаан дээр Р.Амаржаргалыг Ерөнхий сайдад нэр дэвшүүлэх асуудлыг хэлэлцэхэд хоёр удаа санал хураах болж байгаа юм. Юуны өмнө АН-ын хяналтын хорооны тогтоол буюу АН-ын УИХ-дахь бүлэг дүрмийн бус шийдвэр гаргасан гэх асуудлыг хэлэлцэх эсэх талаар санал хураалт явуулна. Хэрвээ үүнийг авч хэлэлцээд хяналтын хорооны тогтоолыг батлачихвал байдал хүнд болно. Гэхдээ мэдээж олонхиороо АН-ын бүлгийн шийдвэрийг дэмжээд гарах болно. Харин энэ санал хураалтаас хэн ямар санал өгөв гэдгийг тооцоолж “Алтангадас”-ынхан хурлын найруулгаа хийх болов уу? нэг ёсондоо хяналтын хорооны тогтоолоор түншиж үзээд дараа дараагийн алхамаа хийж Р.Амаржаргалыг унагах талаас нь ажиллаж, заалнаас санал хуваах хүн нэр дэвшүүлэх зэрэг ажиллагаа хийгдэх гэнэ.

    Гэхдээ ҮЗХ хуралдсан нөхцөлд л “Алтангадас”-ынхан ийм тоглолтыг хийх болно. Харин “Алтангадас”-ынхан ҮЗХ-ны ирцийг хүргэхгүй байж магадгүй гэсэн таамаг тус намынханы дунд их яригдах боллоо. Ирвэл зохих 194 гишүүнээс 97 гишүүн ирэхгүй байхад ирц хүрэхгүй. Тэгэхээр “Алтангадас”-ын 80 орчим гишүүн дээр нэмээд 17 хүнийг урвуулж чадвал Р.Амаржаргалыг Ерөнхий сайд болгочихгүй торгоож байх хугацаа хожино гэсэн үг. Харин энэ хооронд Н.Алтанхуяг ба түүний багийнхан МАН-ынхантай тохирч дараагийн Засгийн газрыг байгуулах санаачлагыг гартаа авахаар оролдож байна. “Р.Амаржаргал Ерөнхий сайд болбол ойлголцоход хэцүү, багаа бүрдүүлэхэд улстөрийн тохиролцооноос илүү өөрийн үнэлэмж, шалгуураа тулгана. Харин “Алтангадас”-аас дараагийн Ерөнхий сайд гарвал тохиролцож, ойлголцоход маш амархан”  гэсэн мессежийг МАН-ынханд ихээр дуулгах болжээ.

    Гэвч МАН-ынхан одоохондоо бүхнийг ажиглаж Н.Алтанхуягтай ямар нэг яриа тохироо хийх сонирхолгүй байна. Мөн “Алтангадас”-ынхан эхнээсээ бууж өгч Р.Амаржаргалын өрөөгөөр эргэлдэх болсон гэдгийг эх сурвалжууд мэдээллэж байна. Гэвч “Алтангадас”-ынханы толгойд юу ч төрж магадгүй гэдгийг мартаж болохгүй. Учир нь тэд бол үеийн үед АН-ын бүх тоглолтыг найруулж, хор, жорыг тааруулж ирсэн бүлэглэл. Тэгэхээр АН-ынхан “Алтангадас”-даа баяртай! гэж хэлэх үү? аргамжаанд нь ороод ахиж дэглүүлэх үү? гэдэг нь өнөөдрийн ҮЗХ-ний хурлаас тодорхой болно.