Монгол-БНСУ-ыг холбосон шугамыг улайстал МАХН-ынхан Н.Энхбаяр даргатайгаа ярьж байгаа мэдээлэл ирлээ. Тэд дараагийн Засгийн газарт яаж ийгээд үлдэх талаар санал солилцож байгаа аж. Н.Энхбаяр дарга нь ч гэсэн “Та бүхэн Засгийн газартаа үлдэх талаар ажилла. 10 жил хамтран ажиллах гэрээг цуцалж болохгүй. Гэрээний ач холбогдолыг АН-нханд ойлгуулах талаар ажилла” гэж үүрэг даалгавар өгсөн сураг гарлаа. Бас Н.Энхбаяр дарга АН-ын нөлөө бүхий хүмүүстэй утсаар холбогдоод байгаа аж. Тиймээс л МАХН-ынхан “бидэнтэй хамтраад Засгийн газраа байгуулвал 2016 онд бид МАН-ын саналыг хуваана. Та бүхэн эрх баригч болно” гэж ухуулан сэнхрүүлэх ажилаа сайн хийж байгаа бололтой. Нөхцөл байдал тийм ч байж болно. 2016 оны сонгуулийн өмнө Н.Энхбаяр дарга ирээд МАН-ын эсрэг сайн ажиллаад өгөхөд багагүй хувийг нь зулгаачихна. Ингээд МАН-ынхны эрх баригч болно гэсэн мөрөөдөл устана. Ийм л зүйлийг эрх баригчид хамтрагчидтайгаа тооцоолж суугаа бололтой. Гэхдээ Р.Амаржаргал, Ч.Сайханбилэг хоёрын хэн нь ч Ерөнхий сайд болсон МАХН-тай хамтарна гэдэг ихээхэн эргэлзээтэй. Учир нь эрх баригчид одоо МАН-ынхантай хамтрах өөрт нь хэрэгтэйг ойлгож эхэлсэн. С.Баярцогтын тодорхойлсноор "урвагчид"-тай дахин хамтраад үйлээ үзээд явах АН-ынханд хэцүүгээс гадна хэврэг Засгийн газар болно.

    Ийм учраас МАХН-ынхан  дотор өөрсдийнхөө ирээдүйг тун бүрхэг гэж үзэх хэсэг байгаа аж. Засгаас шахагдаад гарвал улам л бүүдийнэ. Дараагийн Засгийн газарт орж чадахгүй бол дахин хэзээ ч засаг барилцахгүй юм шиг хандах гишүүд цөөнгүй байгаа аж.

    Харин ганц нэг гишүүд нь сөрөг хүчний орон зайд орж ажиллана гэсэн том зорилго өмнөө тавьсан сураг ч гарлаа. Тэд хамгийн түрүүнд МАНАН-гийн Засгийн газар гэсэн давшилт хийх стратеги боловсруулсан гэнэ.

    Уг нь хамгийн анх МАНАН-гийн Засгийн газар гэсэн нэр томьёлолыг Н.Энхбаяр бодож олоод олон нийтэд зарласан юм. Тэрээр МАН-аас гараад тухайн үеийн Засгийн газрыг МАНАН гэж тодорхойлсон юм. Дараа нь цөөнгүй удаа давтсаны үр дүнд МАНАН гэсэн томьёолол амжилттай нутагшсан билээ. Ингээд 2012 оны сонгуулиар МАХН-ынхан багагүй хувь авч 11 суудалтай болоход МАНАН гэсэн шүүмжлэл чухал нөлөөлөл үзүүлсэн. АН-ынхан өөрсдийг нь Засгийн газарт оруулахгүй МАН-тай нийлвэл ээлжит МАНАН гэсэн нэршил хэрэг болно гэж сайтар тооцоолж байгаа аж. Гэхдээ “нэг голын усанд хоёр удаа орж болдоггүй” гэдэг шиг нэг сонгуулиар хэрэглэгдсэн МАНАН гэсэн үг 2016 онд тийм ч их нөлөөлөл үзүүлэхгүй гэдгийг зарим нэгэн ойлгохгүй  байгаа бололтой.

    Ямар ч гэсэн МАХН-ынхан Засагт орохын төлөө намын дарга Н.Энхбаяртайгаа нийлээд эрчимтэй ажиллаж байна. Хамтрах сүүлийн боломж гэсэн өнцөгөөс асуудалд хандах бололтой. Хамтрахгүй бол сөрөг хүчин болоод өмнө ч гөвж байсан хамтрагч АН-аа бас МАН-ыг сайтар балбах төлөвлөгөөтэй боловсруулсан гэж эх сурвалж мэдээллээ.