2015 оны төсвийг өнөөдөр баталсантай холбогдуулан УИХ-ын дарга З.Энхболд, УИХ дахь намын бүлгүүдийн дарга нартай хамтран хэвлэлийнхэнд мэдээлэл хийлээ.

Засгийн газраас өргөн мэдүүлсэн 2015 оны төсвийн төсөлд улсын төсвийн орлогыг 7.1 их наяд төгрөгөөр, зардлыг 7.6 их наяд төгрөгөөр төсөөлсөн байсан юм. Харин УИХ-аас 2015 оны төсвийн хуулийг батлахдаа төсвийн орлогыг хуучнаар нь буюу 7.1 их наяд төгрөгөөр төсвийн зардлыг 100 гаруй тэрбум төгрөгөөр бууруулж, алдагдлын хэмжээ 439.2 тэрбум төгрөг буюу ДНБ-ний 1.8 хувьтай тэнцүүлсэн.

УИХ дахь АН-ын бүлгийн дарга Д.Эрдэнэбат ирэх оны төсвийн талаар ярихдаа “Ерөнхий сайд болон Сангийн сайд нь байхгүй байхад УИХ-д суудалтай намууд зөвшилцөж харьцангуй сайн төсөв боловсруулж чадлаа. Дутагдалтай зүйл бий. Түүнийгээ 2015 оны төсвийн тодотголыг хэлэлцэх үеэр шийдээд явна. Цалинг 500 тэрбумаар нэмсэн нь урьд хожид байгаагүй үзэгдэл. Мөн зэргэлдээ сумуудын дэд бүтцийг шийдэж чадлаа” гэв.

УИХ дахь МАН-ын бүлгийн дарга С.Бямбацогт “Манай бүлэг 2015 оны төсвийн асуудлаар нийт 8 удаа хуралдаж Засгийн газарт өөрсдийн санал дүгнэлтийг хүргүүлсэн. МАН-ын бүлэг 2015 оны төсвийг хариуцлагагүй, нарийн тооцоо судалгаагүй муу төсөв болсон гэж үзэж байна” гэж хэллээ.

Харин “Шударга ёс” эвслийн бүлэг дарга Н.Батцэрэг “2015 оны төсвийг цаг хугацаанд баригдаж баталсан. Оны эхээр төсөвт тодотгол хийх үеэр орхигдсон асуудлуудаа эргэж сайжруулъя гэсэн байр суурьтай байна. Төсөвт тодотгол хийнэ гэсэн хүлээлттэйгээр 2015 оны төсвийг баталсан” гэв.