УИХ –ын өнөөдрийн чуулганы үдээс өмнөх хуралдаанаа 2015 оны төсвийн тухай хуулийг баталсан. Түүнтэй холбогдуулан УИХ –д суудалтай намын бүлгийн дарга нар өөр өөрийн байр сууриа илэрхийлсэн юм. Ирэх оны төсвийн тухай хуулийг МАН –ын бүлгийн дарга С.Бямбацогт ийнхүү дүгнэсэн юм.
УИХ дахь МАН –ын бүлгийн дарга С.Бямбацогт: Засгийн газар Монгол Улсын түүхэнд байгаагүй хариуцлагагүй, замбараагүй төсөв өргөн барьсан

-МАН –ын бүлгийн зүгээс 2015 оны төсвийн талаар ямар байр сууртай байгаа вэ?
-Монгол Улсын 2015 оны төсөв буюу ирэх онд Монгол улс маань хэр орлоготой, хэр зарлагатай байх. Ард иргэдийн амьдрал хэр байх вэ гэдэг зүйлийн хүрээнд УИХ дахь нам, эвслийн бүлгүүд 2015 оны төсвийг цаг хугацаанд нь баталлаа. УИХ дахь МАН –ын бүлэг төсөв өргөн барьсанаас хойш нийтдээ найман удаа хуралдаж төсвийн талаар санал бодлоо солилцож, алдаатай гэж үзсэн зүйлүүдээ Засгийн газарт танилцуулж, тодорхой хүрээнд өөрсдийн санаа бодлоо тусгаж чадлаа. Засгийн газар Монгол улсын түүхэнд байхгүй, хариуцлагагүй, замбараагүй тийм төсвийн тухай хууль өргөн барьсан. Тухайлбал төсвийн тухай хуультай холбоотой олон зүйл заалтыг зөрчсөн. байсан.
-2015 оны төсвийн алдагдлын талаар?
-Төсвийн алдагдал өнгөрсөн онд нэг их наядаар тасарч байсан. Энэ жил 800 гаруй тэрбум төгрөгөөр тасарсан байгаа. Энэ мэтээр төсвийн алдагдалаа бодитой тооцож чадсангүй. Алдаа дутагдалтай ард иргэдийнхээ нуруун дээрх татварын хэмжээг нэмэгдүүлсэн. Хамгийн ноцтой асуудал бол 2011 онд улсын төсвийн зээлийн үйлчилгээний зардалд 37 тэрбум төгрөг зарцуулж байсан. Энэ жил үүнээс 20 дахин их буюу 700 гаруй тэрбум төгрөгийг зээлийн үйлчилгээний зардалд зориулахаар оруулж ирсэн.
-УИХ дахь МАН –ын бүлгүүдээс Засгийн газарт төсвийн талаар ямар санал дүгнэлт, шаардлагыг тавьсан бэ?
-Засгийн газарт ард иргэддээ дарамт учруулахгүй байхын тулд өргөн барьсан дөрвөн татварын хуулийг буцаах шаардлагыг тавьсан. Өрийн бодлогыг нэмэгдүүлэхгүй байх гаднаас зээл тусламжийг авахгүй байх шаардлага хүргүүлсэн. Цалин тэтгэврийг төрийн байгууллагын бүтэц зохион байгуулалт өөрчлөгдсөнтэй холбогдуулан үүгээрээ тооцоо судалгаатайгаар нэмэх санал тавьсан. Мөн УИХ –ын гишүүдтэй санал нэгдэж 2011 оноос хойш царцаагдсан объетуудыг дуусгахаар болсон байгаа. Харамсалтай нь 2015 онд шинээр хөрөнгө оруулалт бага хийгдэхээр болсон. Ирэх онд бүсээ чангалсан жил болно. Бидний зүгээс тавьсан санал дүгнэлтүүд 2015 оны төсөв болон төсвийг дагалдсан хууль тогтоолуудад бүрэн хэмжээгээр тусгагдсан. Өөрөөр хэлбэл энэ удаагийн төсвийн  асуудлаар УИХ дахь нам, эвслийн бүлгийн гишүүд санал нэгтэйгээр хамтарч, амжилттайгаар хугацаанд нь баталж чадлаа гэж МАН бүлэг дүгнэж байна.