Дараагийн Ерөнхий сайд тодорлоо. Ч.Сайханбилэг хэмээх сайхан нэртэй, азтай залуу Ерөнхий сайдаар ажиллах нь бараг тодорхой боллоо. “Та сувгаа бүү солиорой” гэдэг байсан залуу одоо орой болгон таньтай цэнхэр дэлгэцээр мэндчилдэг болно. Гэхдээ улс орны хөгжлийн бодлого ярьж шүү дээ. Ч.Сайханбилэгийг Ерөнхий сайд болно гэхээр нэг л итгэл төрдөггүй. Зүүдэндээ итгэдэггүй шиг. Зүүд заримдаа үнэн болдог. Тэгэхээр Ч.Сайханбилэг Ерөнхий сайдаар томилогдох нь бараг л гарцаагүй боллоо. Уг нь С.Баярцогт л Ерөнхий сайд болохоор бэлтгэгдсэн улс төрч байлаа. Оффшор данс гэгчээс болоод сайхан ирээдүйгээ балласан юм даа. Тэгээгүй бол яг өдийд Монгол Улсын шинэ Ерөнхий сайд Сангажавын Баярцогт гээд бичигдэх байсан. Даан ч түүх тэгж бичигдсэнгүй.
          Шинэ Ерөнхий сайд тодрох торгон агшинд Монгол Улсын Ерөнхийлөгч Ц.Элбэгдорж UBS -ээр “Улс төрд шинэ манлайлагч” хэмээх төслийн залуустай ярилцаж таарав. Түүнээс нэгэн оролцогч одоо томилогдох Ерөнхий сайдыг ямар хүн байгаасай гэж бодож байна вэ? хэмээн асуусан юм. Хариуд нь Монгол Улсын Ерөнхийлөгч Ц.Элбэгдорж “Шинэ Ерөнхий сайд 2016 оны сонгууль, улс төрийг бодох шаардлагагүй. 2016 оны сонгуульд нэр дэвшихгүй гэдгээ хэлэх хэрэгтэй.  Улс төр бодолгүй улс орноо бодож ажиллах хэрэгтэй.  Одоо томилогдох Засгийн газар авралын Засгийн газар. Маш хэцүү хүнд үед ажиллах Засгийн газар. Золиосны Засгийн газар. Монголын төлөө өөрийгөө золиослох Ерөнхий сайд хэрэгтэй. Мэргэжлийн асуудал шийддэг Засгийн газар байгаасай” гэсэн утгатай зүйлийг ярив.
                Ерөнхийлөгч хэнийг Ерөнхий сайд болохыг бараг л мэдэж байсан болов уу даа. Тиймээс л Ч.Сайханбилэгт хаяглаж дээрх үгийг хэлсэн байх магадлалтай. Ерөнхийлөгчийн байр суурийг дүгнэж үзвэл шинэ Ерөнхий сайдад улс төрийн оноо бодож биш зөвхөн улс орноо бодож ажиллах ёстойг урьдчилан сануулж байна. Улс орны эдийн засгийн нөхцөл байдал маш хүнд болсон. Ард түмэн эдийн засгийн хямралаас гаргах аврагчийг хүсч байна. Тиймээс л Ерөнхийлөгч авралын Засгийн газар гэсэн үгийг хэрэглэв. Мөн өнөөгийн эдийн засгийн хүнд хэцүү байдлаас гарахын тулд шинэ Ерөнхий сайд өөрийгөө золиосолж ажиллах ёстойг ч анхааруулав. 2016 оны сонгуульд нэр дэвшинэ гэж араа бодолгүй ажиллах ёстой. Өөрийгөө золиосолж ажиллах хэрэгтэй. Тиймээс золиосны Засгийн газар гэсэн санааг ч хэлэв.  Дээр нь нэмээд Ерөнхийлөгч Мэргэжлийн Засгийн газар гэсэн үгийг дайв. Өөрөөр хэлбэл тэрээр шинэ Засгийг давхар дээлгүй өмнөхөө хийгээд явах мэргэжлийн хүмүүсээр сайдуудыг томилохыг анхааруулав. Монгол Улсын Ерөнхийлөгчийн энэхүү захиас шинэ Ерөнхий сайдад олон зүйлийг бодогдуулах байх. Хүнд хэцүү эдийн засагтай улс орныг хүлээж авч байгаагаа ард түмэндээ зарлах хэрэгтэй. Ийм улс орныг хүлээж аваад ийм болгохын төлөө өөрийгөө золиосолж ажиллаж чадна гэж ард түмэндээ амлалтаа өгөх хэрэгтэй л дээ. Тэгээд түүнийхээ төлөө махран зүтгэвэл ард түмэн хүрээлэн дэмжинэ. Ингэж чадахгүй Н.Алтанхуяг шиг өмнөхөөс боллоо гээд нялцганаад байвал сайн юманд хүрэхгүй. Гэхдээ Ч.Сайханбилэг өмнөхөөс боллоо гэдэг үгийг жинхэнэ утгаар нь хэлэх эрхтэй хүн л дээ. Н.Алтанхуяг шиг сагаж ханасан өсөлттэй эдийн засаг хүлээж аваагүй. Сүйрсэн, дампуурсан гэсэн тодорхойлолттой эдийн засгийг хүлээж авлаа.
             Энд нэг зүйл тодорхой болж байна. Н.Алтанхуяг, Н.Батбаяр хоёр эдийн засаг өсөлттэй. Эдийн засаг сайн байгаа гэж эцсийн мөчөө хүртэл ярьсан. Тэдний сүйрүүлсэн эдийн засгийг Ерөнхийлөгч хүртэл хүлээн зөвшөөрч “Маш хэцүү нөхцөлд ажиллах Засгийн газар” хэмээн тодорхойлж байна. Ийм л нөхцөлд Ч.Сайханбилэг 28 дахь Ерөнхий сайдаар ажиллахаар УИХ -ын визийг хүлээж эхэллээ.