МУ-ын 28 дахь Ерөнхий сайдаар томилогдохоор УИХ-ын гишүүн Ч.Сайханбилэг тодроод байна. Түүнийг өнгөрсөн баасан гаригт хуралдсан АН-ын ҮЗХ-ны гишүүдийн 53.5 хувийн саналаар Ерөнхий сайдаар томилуулахаар дэмжсэн. Одоо УИХ-д суудалтай улс төрийн намуудтай зөвшилцөж, УИХ-аар хэлэлцүүлэн баталгаажуулснаар Ч.Сайханбилэг албан ёсоор МУ-ын 28 дахь Ерөнхий сайд болно.

Тэгвэл Ч.Сайханбилэгийг өнгөрсөн баасан гаригт Ерөнхий сайдад нэр дэвшүүлсний дараагаар Төрийн тусгай хамгаалалтын газраас хамгаалалтад авчээ.

Төрийн тусгай хамгаалалтын тухай хуулиар “Төрийн гурван өндөрлөг” буюу Ерөнхийлөгч, Ерөнхий сайд, УИХ-ын дарга нарыг мөн шаардлагатай тохиолдолд нэр дэвшигчдийг хамгаалалтад авдаг. Энэ дагуу Ч.Сайханбилэгийг төрийн тусгай хамгаалалтад авлаа.

Хэдийгээр албан ёсоор Ерөнхий сайдаар томилогдоогүй байгаа ч аюул, эрсдлээ бодож, Ч.Сайханбилэгийг хамгаалалтад аваад байгаа юм байна. Одоогоос арваад жилийн өмнө буюу 1998 оны аравдугаар сарын 2-ны шөнө УИХ-ын гишүүн С.Зориг Монгол Улсын Ерөнхий сайдад нэр дэвшээд байхдаа бусдын гарт онц хэрцгийгээр харамсалтайгаар амиа алдаж байсан түүхтэй.

Энэ үед Ерөнхий сайдад нэр дэвшигчийг төрийн хамгаалалтад аваагүй байсны улмаас ийнхүү амиа алдаж байсан хэмээн хэл яриа хүчтэй гарч байжээ. Хэдийгээр С.Зориг агсны хэрэг шиг аймшигт хэрэг болно гэж зөгнөөгүй ч нэр дэвшсэн бол хамгаалалтад авах нь зүйтэй гэж үзэн Ч.Сайханбилэгийг хамгаалалтад авчээ. Ийнхүү хамгаалалтад ороод буй Ч.Сайханбилэг Ерөнхий сайд болвол төрийн тусгай хамгаалалтынхан сайдын суудлаас буутал нь хамгаалах юм.

Харин Ерөнхий сайд, АН-ын даргын албан тушаалаа өгөөд буй Н.Алтанхуягийн төрийн хамгаалалтын зэрэглэлийг өнөөдрийг хүртэл бууруулаагүй байна. Угтаа бол Ерөнхий сайдын албан тушаалаас буусан даруйд нь хамгаалалтын зэрэглэлийг бууруулах ёстой байдаг. Гэтэл Н.Алтанхуягийн хувьд сайдын суудлаа өгөөд арав гаруй хонож байгаа ч ийнхүү хамгаалалтын зэрэглэлийг бууруулаагүй. Хэзээ бууруулах нь тодорхойгүй....

Ерөнхий сайдын суудалд байхдаа ТЕГ, АН-ыг өөрийн хувийн байгууллага болгожээ гэж шүүмжлүүлж байсан Н.Алтанхуяг Төрийн тусгай хамгаалалтыг ч өөрийн болгоод байсан байжээ гэх хардлага өөрийн эрхгүй төрж байна. Үүнийг ч батлав уу гэмээр үйлдлийг Төрийн тусгай хамгаалалтын газрынхан Н.Алтанхуягийг Ерөнхий сайд байхад гаргаж байсан. Тодруулбал, Н.Алтанхуягийг хууль зөрчин байж Төв аймгийн хорих ангид хоригдож буй ахлах зөвлөх Л.Гансүхийг эргэхэд АТГ-ынхан Н.Алтанхуягийг хууль зөрчлөө гэж бичлэг хийж байсан. Харин үүнийг нь Төрийн тусгай хамгаалалтын газрынхан өмөөрч, Ерөнхий сайдын халдашгүй бүрэн эрхэд халдлаа гэж мэдээлэл хийж байсан юм.

Юутай ч Төрийн тусгай хамгаалалтын газрынхан үүргээ биелүүлж, Ерөнхий сайдад нэр дэвшигч Ч.Сайханбилэгийг хамгаалалтдаа авлаа. Харин Н.Алтанхуягийн хамгаалалтын зэрэглэлийг бууруулах нь тодорхойгүй хэвээр..... Одоогоор ТТХГ төрийн гурван өндөрлөгөөс гадна Ерөнхий сайдын үүрэг гүйцэтгэгч, Ерөнхий сайд асан болон Ерөнхий сайдад нэр дэвшигч гээд олон хүнийг хамгаалж байгаа юм байна.