Шинэ Засгийн газар дуншиж байна. Ч.Сайханбилэг гэдэг залуу 28 дахь Ерөнхий сайд болох нь бараг л тодорхой боллоо. Тэрээр амралтын өдрүүдэд хүмүүстэй уузлах, утсаар ярих асуудлыг тасралтгүй хийсэн гэж эх сурвалж мэдээлэв. Шалтгаан нь МАН болон, “Шударга ёс” бүлгийнхнээр дэмжүүлэх гэж. Бас нам дотроо гомдолтой үлдсэн МҮДН, МоАХ-ын гишүүдтэй ч учраа ололцох жижиг ажлууд байжээ. Өнөөдөр намын бүлгүүд түүний асуудлыг хэлэлцэнэ. Маргааш байнгын хороо, чуулганаар хэлэлцэгдээд томилогдоно. Богинохон юм шиг хэрнээ бартаатай зам. Хэрэв хүмүүсийн яриад байгаа шиг МАН-ынхан Ч.Сайханбилэгийг дэмжихгүй ээ гэвэл тэр 28 дахь Ерөнхий сайд гэж бичигдэхгүй ч байж мэднэ. Учир нь МАН-ын атгасан гар шиг 26 санал дээр гомдолтой байгаа  МҮДН, МоАХ-ынхон нэмэгдвэл байдал бишдэнэ. Тэгээд ч өөрийнх нь намын ихэнх гишүүд өмнө Р.Амаржаргалыг дэмжсэн. Өөрөө дундаас нь давхиад ороод ирсэн. Ингэж тооцвол Ч.Сайханбилэг айдастай байх нь аргагүй. Бүх юм МАН-аас хамаарах болчихоод байна.

    Үйл явдал ингэж өрнөж байхад Н.Алтанхуягийн Засгийн газрыг огцруулсан нь зөв буруу гэсэн маргаан нийгэмд өрнөсөөр л байна. Гэхдээ олон хүний амьдрал доройтож, олдог хэдийгээ олж чадахаа байсан учир бүх бурууг Н.Алтанхуягт тохлоо. Харин Монгол Улсын Ерөнхийлөгч Ц.Элбэгдорж өнөөг хүртэл Шинэчлэлийн Засгийн газрыг огцоруулсан талаар байр сууриа илэрхийлэлгүй ирсэн. Тэрээр UBS телевизээр залуустаа уулзах далимандаа “МАН маш сайн тооцож байж Засгийн газрыг огцруулсан. Уг нь Монголд ашиггүй бол Ардын намд ашиггүй л байхгүй юу даа. Одоо намууд Ерөнхий сайдаа батлахдаа дахиж огцруулахгүй гээд гарын үсэг зурчих хэрэгтэй” хэмээн учирлав.

    Эндээс дүгнэж үзвэл МАН-ын хоршсон тоглолтыг Монгол Улсын Ерөнхийлөгч ихээхэн өндрөөр үнэлжээ. МАН-ын бүлгийн гишүүд тооцоо судалгаа сайн хийж, хэзээ Ерөнхий сайдыг огцруулах бараг л мэдэж байж. Тэд санасандаа хүрсэн. Олон Засгийн газар огцрох Монголд ашиггүй л дээ. Гэхдээ огцруулахаас өөр аргагүй муу ажиллаж байгаа нөхдүүдийг аль болох хурдан огцруулах нь монголд л хэрэгтэй. Н.Алтанхуягийн Засгийн газрыг ярьж байснаараа өмнө огцруулсан бол эдийн засаг ингэж хүндрэхгүй ч байсан байж мэднэ. Тиймээс Ерөнхийлөгчийн санал болгоод байгаа “дараагийн Засгийн газраа огцруулахгүй” гэсэн тангарагт МАН-ынхан гарын үсгээ зурахгүй л болов уу? Ирэх хоёр жилийн хугацаанд юу ч болоо билээ? Н.Алтанхуягаас муу ажиллаад ирвэл ард түмний шахалтаар Ч.Сайханбилэгийг Засгийн газрыг огцруулах асуудлыг өргөн барьж л таараа. Тиймээс Монгол Улсын Ерөнхийлөгчийн санал болгосон дараагийн Засгийн газрыг огцруулахгүй гэдэгт улс төрийн намууд гарын үсэг зурж тогтвортой байдлыг хадгал гэдэг санаачилга үр дүн муутай болно гэж судлаачид дүгнэж эхэлжээ.