УИХ дахь Ардчилсан намын бүлэг өнөөдрийн хуралдаанаараа гурван асуудлыг хэлэлцсэн байна. Хамгийн эхэнд Ерөнхий сайдад нэр дэвшигч Ч.Сайханбилэгийн асуудлыг хэлэлцжээ. Ч.Сайханбилэгийг Ерөнхий сайдад нэр дэвшүүлэх эсэх талаар санал хураахад тус бүлгийн 29 гишүүний 19 нь дэмжсэн байна. Энэ талаар тус бүлгийн дарга Д.Эрдэнэбат хэлэхдээ “АН-ын бүлгээс  Р.Амаржаргалын нэрийг Ерөнхий сайдад нэр дэвшүүлсэн. Гүйцэтгэх зөвлөл ч түүний нэрийг хүлээж авсан. Харин Гүйцэтгэх зөвлөл хуралдаад Ч.Сайханбилэгийн нэрийг дэвшүүлсэн байгаа. Ингээд ҮЗХ-ны хуралдаан дээр тус хоёр хүнийг чөлөөт өрсөлдөөнөөр өрсөлдүүлж ҮЗХ-ны олонхийн саналаар сонгосон байгаа. Энэ бол намын дүрмийн хүрээнд шийдвэрлэсэн асуудал. Хууль зөрчсөн зүйл байхгүй. Ингээд бүлгийн хурлаар эцэслэн хэлэлцэж шийдвэрийг гаргасан нь энэ” гэлээ.

Ч.Сайханбилэг нь цөөн гишүүний зөрүүтэйгээр дэмжигдсэн. Тэгэхээр түүнийг цаашид тогтвортой ажиллуулж чадах уу гэдэг асуудал байгаа. Харин энэ асуултад Д.Эрдэнэбат хариулахдаа “АН-ын бүлэг Засгийн газрыг аль болохоор тогтвортой ажиллуулахын тулд ажиллана” гэсэн юм.