УИХ дахь Ардчилсан намын бүлэг хуралдаж Ерөнхий сайдад нэр дэвшигч Ч.Сайханбилэгийн талаар хэлэлцсэн байна. Хуралд оролцсон 29 гишүүний 19 нь түүнийг Ерөнхий сайдад дэмжсэн байна.

Бүлгийн дарга Д.Эрдэнэбат сэтгүүлчдийн асуултад хариуллаа.

-Н.Алтанхуягийг Засгийн газар эдийн засгийг хямраасан гэж үзсэн. Гэтэл Ч.Сайханбилэгийг Ерөнхий сайдад нэр дэвшүүлчихлээ. Засгийн газар нь огцорсон бол бүрэлдэхүүнээрээ огцрох ёстой юу?

-Н.Алтанхуягийг Ч.Сайханбилэгээр сольсон гэж шууд ойлгож болохгүй. Өнөөдөр үйлчилж байгаа Монгол Улсын хуулийн хүрээнд энэ асуудлыг ярина. Засгийн газар огцорсон бол тэр бүрэлдэхүүнээс нь буцаад Ерөнхий сайд сонгож болохгүй ээ гэсэн хуулийн зохицуулалт байхгүй. ҮЗХ-ны шийдвэрийг хуулийнх нь хүрээнд АН-ын бүлэг баталгаажуул гэсэн даалгавар өгсөн учраас санал хураалт явагдсан.

-ҮЗХ хоёр долоо хоногийн өмнө хуралдахдаа Ерөнхий сайдыг тодруулах эрхийг нь УИХ дахь АН-ын бүлэгт өгсөн. Гэтэл Гүйцэтгэх зөвлөлөөс Ч.Сайханбилэгийг нэр дэвшүүлж оруулж ирээд баталчихлаа. Эсвэл тогтоол зассан гээд байгаа нь үнэн болж таарч байна уу?

-ҮЗХ-ны хурлаар бүлэгт эрхийг өгсөн нь үнэн. Энэ хүрээндээ Р.Амаржаргал гэдэг нэр дэвшигчийг бид ҮЗХ-д санал болгосон. Нэр дэвшигчийг батламжилж болно, батламжлахгүй ч байж болох эрх нь зөвхөн ҮЗХ-д хадгалагддаг учраас энэ шийдвэр гарсан гэж ойлгож байна. ҮЗХ нь Р.Амаржаргалын шийдвэрийг хүлэээж авсан. Шинэ гарсан намын дарга хоёр дахь нэр дэвшигчийг Гүйцэтгэх зөвлөлөөр хэлэлцээд оруулж ирсэн. Тийм учраас хоёр нэр дэвшигчийг өрсөлдүүлсэн.

-Чуулган дээр АН-ын бүлэг нэгдсэн байр суурьтай орно гэж тохирсон уу. Эсвэл өнөөдөр эсрэг санал өгсөн гишүүд мөн чуулган дээр тийм санал өгөх үү?

-УИХ-ын гишүүн өөр өөрийн бүрэн эрхтэй. Итгэл үнэмшлээрээ энэ удаагийн бүлгийн хурал дээр саналаа өгсөн гэж ойлгож байна. Чуулган дээр ямар санал өгөхийг би мэдэхгүй. Бүлгийн даргын хувьд хэлэхэд энэ төр тогтвортой байгаасай гэж хүсч байна.

-Ч.Сайханбилэг үнэхээр хямралыг зогсоож чадах уу?

-АН-ын бүлэг олонхиороо шийдвэр гаргасан. Энэ дээр хэн нэгний тухай биш урагшаа харж ажиллах тухай яригдана. Эдийн засгийн нөхцөл байдлаар гишүүд өөр, өөрсдийн байр суурийг илэрхийлж байна. Ч.Сайханбилэгийн Засгийн газар байгуулагдвал үнэхээр энэ хүндрэлийг давж туулах чадвартай баг бүрдээсэй гэж хүсч байна.