МАН Ерөнхий сайдад нэр дэвшигч Ч.Сайханбилэгийг дэмжих боломжгүй гэдгээ олон нийтэд мэдэгдлээ. УИХ дахь МАН-ын бүлэг өчигдөр хуралдаж Ерөнхий сайдад нэр дэвшигч Ч.Сайханбилэгийг дэмжих эсэх асуудлыг хэлэлцсэн. Тус бүлгийн хуралд Ч.Сайханбилэг болон УИХ-ын дарга З.Энхболд нар сууж гишүүдийн асуултад хариулсан юм. Тэднийг хурлаас гарсаны дараа бүлэг санал хурааж Ч.Сайханбилэгийг дэмжих боломжгүй гэдэг шийдвэрийг гаргасан байна. Үүний дараа тус намын Удирдах зөвлөл шөнө болтол хуралдаж бүлгийн шийдвэрийг дэмжжээ.

Удирдах зөвлөлийн 21 гишүүний 63 хувь нь Ч.Сайханбилэгийг дэмжих нь зарчмын хувьд буруу гэж үзжээ.
 
МАН-ын дарга М.Энхболд энэ талаар ярихдаа “Ардчилсан намаас энэ сарын 17-ны өдөр МАН-д Монгол Улсын Ерөнхий сайдад нэр дэвшүүлэгч Чимэд овогтой Сайханбилэгийн талаар зөвшилцөх бичгийг Үндсэн хуулийн 33 дугаар зүйлийн 2 дугаарт заагдсаны дагуу албан тоот ирүүлсэн байгаа. Ингээд 17, 18-ны өдрүүдэд МАН-ын удирдах зөвлөл, УИХ дахь манай намын бүлэг тус тусдаа хуралдаж, өчигдөр орой удирдах зөвлөлийн хурлаа дэмжих боломжгүй гэсэн шийдвэрийг гаргалаа. Улс орны нийгэм, эдийн засгийн байдлыг өнөөдрийн хямралд хүргэсэн, улс орныг өрийн дарамтанд оруулсан шинэчлэлийн гэх нэртэй, огцорсон Засгийн газрын хэрэг эрхлэх газрын даргаар ажиллаж байсан энэ хүнийг шинээр байгуулагдах Засгийн газрын тэргүүнээр томилох саналыг зарчмын хувьд дэмжих боломжгүй гэж үзсэн. Шинээр байгуулагдах Засгийн газар Монгол орны эдийн засаг, нийгмийн амьдралд тулгамдсан олон асуудлыг шуурхай, түргэн шийдвэрлэж, шинэ арга барил, санаа гаргаж ажиллах ёстой. Өмнөх Засгийн газрын алдаатай бодлогуудыг засаж, залруулах ёстой. Энэ асуудал бол шинээр байгуулагдах Засгийн газрын хамгийн чухал зорилт учраас өмнөх Засгийн газарт хэрэг эрхлэх газрын даргаар ажиллаж байсан хүн бол энэ тавигдаж байгаа шаардлагыг хэрэгжүүлж, биелүүлж чадахгүй гэж үзэж байна. Бид улс орны өмнө тулгамдаж байгаа асуудлыг шийдвэрлэх, улс төрийн болон эдийн засгийн тодорхой мэдлэг, туршлагатай, УИХ дахь бүлгийнхээ дэмжлэгийг авч чадахуйц, УИХ-д байгаа улс төрийн намуудтай ойлголцож, ажиллаж чадах дараагийн хүнийг дэвшүүлбэл, зөвшилцөхөд бэлэн байна” гэлээ .

Өнөөдөр өглөө МАН-ын Удирдах зөвлөлийн шийдвэрийг УИХ-ын дарга, Ардчилсан намын дарга З.Энхболдод гардуулж өгчээ.