МАН-ын дарга М.Энхболд, бүлгийн дарга С.Бямбацогт, Ерөнхий нарийн бичгийн дарга Ж.Мөнхбат нар Ерөнхий сайдад нэр дэвшигч Ч.Сайханбилэгийг дэмжих боломжгүй талаар мэдээлэл хийлээ. Хэвлэлийн хурлын дараа тэдний байр суурийг сонслоо.

-МАН-ын бүлэг дотроо хоёр хуваагдсан гэсэн мэдээлэл гарч байна. Бүлгийн хуралдаандаа яг нэгдмэл байр суурьт хүрч чадсан уу?

-Ж.Мөнхбат: Зарим мэдээллийн хэрэгслээр тийм мэдээлэл гарсан байна. Энэ бол ташаа мэдээлэл. Хуулийн дагуу АН-ынхан улс төрийн намуудтай зөвшилцөх санал тавьсан. Энэ дагуу Удирдах зөвлөл хуралдаж, бүлгийнхээ хуралдаанд Ардчилсан намын дарга болон Ерөнхий сайдад нэр дэвшигчийг урьж саналыг нь сонссон. Мөн бүлгийнхээ гишүүдийн саналыг нь сонссон. Түүнээс биш санал хураалт явагдаагүй. Эцсийн шийдвэр бол намын Удирдах зөвлөлийн хурлаар гарсан.

-Хамтарсан Засгийн газарт орох уу?

-Ардчилсан намаас зөвхөн Ерөнхий сайдад нэр дэвшигчийг дэмжих эсэх асуудлаар зөвшилцөх санал ирүүлж бид шийдвэрээ гаргасан. Хамтрах эсэх асуудал өнөөдөр МАН-д ирээгүй. Тиймээс хариулт өгөх боломжгүй.

-МАН-ын Удирдах зөвлөлд хичнээн гишүүн байдаг вэ. Хэдэн хувийн саналаар зөвшилцөх боломжгүй гэж үзсэн бэ?

-М.Энхболд: Удирдах зөвлөл бол улс төрийн шийдвэр гаргадаг байгууллага. Улс төрийн намын тухай хуулинд намын бүлэг, намын удирдах зөвлөл хоорондоо харилцан ажиллах талаар тодорхой заагдсан. Энэ дүрэм журмын дагуу МАН үндсэн дүрэмд захирагдаж энэ хоёр байгууллага үйл ажиллагаагаа уялдуулж явдаг. МАН-ын удирдах зөвлөл 21 гишүүнтэй. 63 хувь нь зөвшилцөх боломжгүй гэсэн шийдвэрийг гаргасан. Хамтрах тухай асуудал Засгийн газрыг огцруулахаас эхлээд л яригдаж эхэлсэн.  2012 оноос хойш Засгийн газарт орсонгүй гэдэгтээ өсөрхөж, энэ асуудлыг тавиагүй. Засагт орох бодолтойгоор Засгийн газрыг огцруулаагүй. Улс орны эдийн засагт тулгамдаад байгаа энэ асуудлыг Засгийн газар шийдвэрлэж чадахгүй гэдэг нь харагдаж байгаа учраас хариуцлага тооцох асуудыг олон удаа тавьсан. Тиймээс цаашид улс орны эдийн засгийг үргэлжлүүлж авч явах ийм чадалтай боловсролтой хүн үргэлүүлж авч явах ёстой.

-Р.Амаржаргал гишүүн байсан бол танай нам дэмжих байсан уу?

-Тийм хүн орж ирсэн бол дэмжих байсан, ингэх байсан гэдэг дээр шууд хариулах боломжгүй. Бид оруулж ирсэн асуудлыг хэлэлцээд тодорхой хариу өгч байгаа. Дараа, дараагийн хүмүүсийн хувьд бидний тавьсан шаардлагыг хангасан хүнийг оруулж ирвэл бид зөвшилцөхөд бэлэн байна.