Өчигдөр Монгол Улсын Ерөнхийлөгч Ц.Элбэгдорж Монгол Улсын Ерөнхий сайдад нэр дэвшигч Ч.Сайханбилэгийн нэрийг УИХ-ын дарга З.Энхболдод албан ёсоор өргөн барилаа. Ингэснээр УИХ-ын төрийн байгуулалтын байнгын хороо, УИХ-ын чуулганы нэгдсэн чуулганаар Ерөнхий сайдыг томилох асуудлаар санал хураалт явуулах нь тодорхой болов. Гэтэл Ерөнхий сайдад нэр дэвшигч Ч.Сайханбилэгийг АН-ын бүлгээс 19 гишүүн л дэмжсэн. Мөн МАН-ын 26 гишүүн түүнийг дэмжихгүй гэдгээ албан ёсоор илэрхийлсэн билээ. Ингэснээр АН-ын зарим гишүүд, МАН-ын бүлгийн гишүүдтэй ижил эсрэг санал өгвөл Ч.Сайханбилэг Ерөнхий сайдаар томилогдохгүй байж болох нөхцөл үүсээд байгаа билээ. Мөн “Шударга ёс” эвслийн бүлгээс Г.Уянга, Л.Цог нарын гишүүд түүнийг дэмжихгүй байгаагаа илэрхийлсэн.  Нам дотроо хагас дэмжлэгтэй, сөрөг хүчний хатуу эсэргүүцэлтэй, нийгмийн сэтгэл зүйд төдийлөн итгэл үнэмшил төрөхгүй байгаа энэ нөхцөлд АН асуудлыг хүчээр шийдээд явбал нөхцөл байдал улам хүндрэх нь тодорхой. Тийм учраас нам дотроо Ч.Сайханбилэгийг нэр дэвшүүлэх эсэхийг дахин ярилцья гэдэг санал хүчээ авчээ.

    Харин төр Засгийн ажил ингэж удаашраад байгаа нь Монгол Улсын Ерөнхийлөгч Ц.Элбэгдорж, УИХ-ын дарга, АН-ын дарга З.Энхболд нарт огтхон ч таалагдахгүй байна. Тэдний аль аль нь АН-ын ҮЗХ-ны шийдвэрийг хэрэгжүүлж Ч.Сайханбилэгийг Ерөнхий сайдаар томилоод явья гэдэг дээр санал нэгдээд байгаа. Ялангуяа АН-ын шинэ дарга З.Энхболд өөрийнхөө сонгогдсон хурлаас гарсан шийдвэрийг хэрэгжүүлж чадахгүй бол их хурлынхаа өмнө эвгүй байдалд орно. Хэдийгээр Р.Амаржаргалыг Ерөнхий сайд болооч гэсэн саналыг хэлж, дэмжиж ажилласан ч нэгэнт олонхийн шийдвэр гарсан тул түүнийг биелүүлэх ёстой гэсэн байр суурьтай болжээ.

    АН-д Ч.Сайханбилэгийг эргэж ярилцах тухай яриа гармагц түүнээс өрсөж асуудлаа халуун дээр нь олонхиороо түрээд явья гэдэг гаргалгааг намын удирдлагууд нь хийжээ. Ингээд УИХ-ын дарга З.Энхболд намын бүлгийн хурал дээрээ Ч.Сайханбилэгийн эсрэг санал өгсөн 10 гишүүнийг нэр бүрчлэн хүлээж авч уулзсан байна. Тэрээр “Асуудал удаашрах тусам хүндэрнэ гэдгийг сануулаад. АН-ын ҮЗХ-ны олонхийн шийдвэрийг хэрэгжүүлэх ёстой. Хэрвээ Ч.Сайханбилэг Ерөнхий сайдад дэмжигдэхгүй бол Р.Амаржаргалыг ч дэмжихгүй шүү!” гэдгийг эсэргүү гишүүддээ хатуу сануулжээ. Ийнхүү ганцаарчлан уулзсаны дараа АН-ын бүлгийн хурал эхэлсэн юм. Тус хурал нэлээд удаан сунжирсан бөгөөд эх сурвалжуудын мэдээллэж байгаагаар Ч.Сайханбилэгийг олонхиороо хүчлээд гаргаж ирэх ёстой гэдэг шийдэлд хүрсэн байна. Мөн өөр санаа бодолтой байгаа гишүүддээ хандаж “дандаа үйлчилдэггүй, эрхлүүлж байдаг намын дүрэм гэж байхгүй шүү” гэдгийг сануулаад авчээ.

    Ийнхүү АН-ын бүлэг нэр дэвшигчээ хүчээр томилуулна гэсэн тохироог хийсэн ч олон гишүүн нь хүмхийгээ зуугаад гомдолтой хоцорсон гэдгийг эх сурвалж онцолж байна. Удтал сунжирсан бүлгийн хурлаас шалтгаалж төрийн байгуулалтын байнгын хорооны хурал 3 цагийн дараа эхэлсэн.

    Гэхдээ байнгын хорооны хурал ч мөн нэлээд удаж байж эхэлсэн юм. Учир нь тус байнгын хороонд харьяалагдах МАН-ын 7 гишүүн хуралд суугаагүй. Мөн Г.Уянга гишүүн хуралд орохгүй гэдгээ мэдэгдсэн, Л.Цог гадагшаа явсан. Мөн АН-аас Р.Бурмаа гишүүн бүлгийн хурлаас гараад “ядарч байна, хуралд суухгүй” гэж хэлээд байнгын хорооны хуралд оролгүй яваад өгсөн. Мөн Б.Наранхүү гишүүн тодорхойгүй шалтгаанаар хуралд суугаагүй. Ингээд байнгын хорооны 9 гишүүн ирц бүрдүүлэх гэж үйлээ үзсэний эцэст Р.Бурмаа гишүүнийг олж ирж нэр дэвшигч Ч.Сайханбилэгийг хуралд суусан 10 гишүүн бүгд дэмжсэн юм.  Ингээд түүнийг УИХ-ын чуулганаар авч гарах л ажил үлдлээ.

    Ийнхүү АН-ынхан  АН-ынхан зөрчил, тэмцлээ шүд зуугаад ч болтугай хойш нь тавиад  Ч.Сайханбилэг Монгол Улсын шинэ Ерөнхий сайдаар томилох нь тодорхой болжээ.