УИХ-ын чуулганаар Ч.Сайханбилэгийг Ерөнхий сайдад томилох эсэх асуудлыг хэлэлцэж байна. Гишүүд нэр дэвшигчид хандаж үг хэлээ. Ихэнх гишүүд Ч.Сайханбилэгт амжилт хүсээд эдийн засгийг даруй өндийлгөх, тэтгэвэр тэтгэмжийг нэмэх, цэцэрлэг сургуулийн тоог олон болгох, сум орон нутгийн хөгжлийг анхаарах, Оюутолгой, Тавантолгойн асуудлыг нааштайгаар шийдвэрлээрэй гэх мэт захиасыг захилаа.

Харин УИХ-ын гишүүн Ч.Улаан "Оюутолгой бидний толгойны хавдар болсон шүү. Тийм учраас тэвчээртэй, хүлээцтэй байгаарай. Тэгэж байж асуудлыг нааштайгаар шийдвэрлээрэй. Мэргэжлийн байгууллагууд дахь мэргэжлийн хүмүүсийг халж сольж болохгүй. Сууж байгаа мөчрөө тасдаж болдоггүй юм шүү. Санасан бүхнээ гүйцэлдүүлэх боломжгүй. Гэхдээ хөл алдаж, хөвж болохгүй. Засгийн газраас маш их зүйл хүсч хүлээж болохгүй шүү, гишүүд ээ. Цаг хугацаа, нөхцөл боломж нь өнөөдөр байхгүй байна. Амьдралыг чадан ядан залгуулах нь л чухал болоод байна,, одоогийн байдлаар. Хүсэл, хэрэгцээгээ хязгаарлаж, бодит байдалд нийцэж ажиллаарай. Засгийн газар нь зүтгэж, бусад нь захиа даалгавар өгч байдаг, энэ янзаараа хол явахгүй ээ, хамтдаа л зүтгэх хэрэгтэй " гэв.