Шинэчлэлийн засгийн газар огцорч засаг эзгүйрсэн хүнд үед 2015 оны төсвийн тухай хуулийг халтуурдаж баталсан гэхэд болно. Учир нь Сангийн сайд байхгүй, Ерөнхий сайд байхгүй нөхцөл байдалд УИХ –д суудалтай намын бүлгүүд хоорондоо зөвшилцөж арай л гэж цаг хугацаанд нь багтаан баталсан юм. Үүнийгээ ч нам, эвслийн бүлгүүд хүлээн зөвшөөрч төсвийн тодотголыг чамбай хийх хэрэгтэй хэмээн мэдэгдэж байсан юм. УИХ ирэх жилийн төсвийн орлогыг танаж, хассаар 7.1 их наяд байхаар баталсан.  Тэгвэл өнөөдөр шинэ Ерөнхий сайд Ч.Сайханбилэг үүрэгт ажлаа хүлээж авсан даруйдаа төсвийг дахин нэг их наядаар танана гэдгээ мэдэгдлээ. Хэрэв төсвийг ийм хэмжээгээр багасгавал ард иргэд ирэх жилүүдэд бүсээ улам бүр чангалах шаардлагатай болно.