УИХ –ын өнгөрсөн долоо хоногийн отгон хуралдаанаар Монгол Улсын Ерөнхий сайдад Ч.Сайханбилэгийг сонгож эзгүйрээд байсан Засгийн газрыг эзэнтэй болгосон. Харин МАН –ынхан Ч.Сайханбилэгийг дэмжихгүй гэсэн байр суурьтай байгаа илэрхийлж чуулган болон байнгын хорооны хуралд суусангүй. Тэдний хэлж буйгаар эдийн засгийн хямралыг бий болгосон засгийн газрын “гал тогоог” хариуцаж байхдаа хийж чадаагүй ажлыг одоо хийнэ гэдэгт итгэхгүй байна гэдгээ олон нийтэд илэрхийлсэн. Энэ их эсэргүүцэл, эдийн засгийн хямрал нүүрлэсэн Монгол төрийн гүйцэтгэх засаглалын тэргүүнээр сонгогдсон Ч.Сайханбилэг ард түмэн, төрийн түшээдийн өмнө маш олон сайхан зүйлийг хийж чадна хэмээн амласан. Эдийн засаг хямралтай байгааг хүлээн зөвшөөрч, эдийн засгийг хямралаас гаргах ёстойгоо ойлгосон Ч.Сайханбилэгийн энэ амлалтууд 100 хувь биелэх эсэхийг ирэх өдрүүдэд харж, хүлээж суух л үлдлээ. Ингээд шинэхэн Ерөнхий сайдын УИХ –ын чуулганы индэр дээрээс амласан 24 амлалтыг хүргэж байна.

1.    Шинэ Засгийн газар гурван чиглэлд ач холбогдол өгч ажиллана. Үүнд, нэгдүгээрт, эдийн засаг, хоёрдугаарт, эдийн засаг, гуравдугаарт, мөн эдийн засаг байх болно.
2.    Засгийн газрын гурван гол шинж. Нэгдүгээрт, зөвшилцлийн Засгийн газар, хоёрдугаарт, шийдлийн Засгийн газар, гуравдугаарт шуурхай Засгийн газар байх болно.
3.    Танхим шуурхай ажиллах ёстой.
4.    Эдийн засгийн чухал асуудлыг штабын маягийн зохион байгуулалттай, хурдаар шийдвэрлэх ёстой.
5.    Шинэ Засгийн газарт цаг хугацааны “Аль болох хурдан” гэдэг ганцхан хэмжээс үйлчлэх болно.
6.    Бид эдийн засгаа системээр нь нэг оношлох цаг болсон. Нартай өдөр найрлаж, бороотой өдрүүдэд нь нөмгөн суудаг байдлаасаа одоо гарцгаая. Бороотой өдрүүд эхлэхэд хөрөнгийн хангалттай нөөцтэй, менежментийн зөв тогтолцоотой, эрдслийн шуурхай удирдлагатай эдийн засгаа одооноос бий болгох учиртай. Эдийн засгаа солонгоруулах бодлогоо жинхэнэ ажил хэрэг болгоцгооё.
7.    Эхний ээлжинд аялал жуулчлал, мэдээллийн технологи, хөдөө аж ахуй. Тэр дундаа мах, ноолуурын салбараа уул уурхайгаа зэрэгцүүлж хөгжүүлье.
8.    Урт болон дунд хугацааны бодлогоо зангидах эдийн засгийн үндэсний зөвлөлийг Ерөнхий сайдын дэргэд эрдэмтэн, судлаачид, эдийн засагчид, бизнесийнхэн, гадна, дотны зөвлөхүүдийг оролцуулан байгуулах болно.
9.    Юуны өмнө хөрөнгө оруулалт, хөнгөлөлттэй зээл хоёрын зөв хослол дээр суурилсан өрийн удирдлагын шинэ тогтолцоог бий болгоно.
10.    Засгийн газрын гадаад өрийн үйлчилгээний цогц төлөвлөгөөг боловсруулж, энэ хүрээнд төсвийн зохистой бодлого болон өрийн удирдлагыг оновчтой хэрэгжүүлэх, макро эдийн засгийн гадаад, дотоод тэнцвэрийг хангах арга хэмжээг тусгах болно.
11.    Бидэнд өнөө маргаашдаа бэлэн мөнгөний шинэ урсгал яаралтай бий болгох бодит шаардлага байна. Энэ оны эхнээс эхэлсэн ажлаа дуусган, хөрөнгө оруулалтын сангаа байгуулна. Мөн зарим арилжааны банкны гаднаас хөрөнгө босгох, одоо яригдаж байгаа ажлыг Засгийн газрын зүгээс идэвхтэй дэмжинэ.
12.    Мөн зарим томоохон төслийг хөдөлгөснөөр урьдчилгаа төлбөрийн асуудлыг шийднэ. Ингэснээр америк долларын ханшийн өсөлтийн эсрэг эерэг дохиог зах зээл дээр өгөх юм.
13.    Ирэх арванхоёрдугаар сард багтаан ОХУ-ын төв банктай рублийн своп хэлцэл байгуулна.
14.    ОХУ-тай хийх гадаад худалдаагаа рублээр хийдэг тогтолцоонд шилжүүлнэ. Ингэснээр манай долларын хамгийн том зардал болох шатахууны зардал рубльд шилжиж, ханшид шууд эерэг нөлөө үзүүлэх юм.
15.    БНХАУ-ын дарга Си Зиньпиний Монголд айлчлах үеэрээ амласан нэг тэрбум ам.долларын хөнгөлөлттэй зээлийг бид авч, эргэлтэнд оруулах учиртай.
16.    Бид цаашдаа алдаан дээрээсээ суралцан 30, 40 жилийн дараа төлөгдөх бага хүүтэй, урт хугацааны хөнгөлөлттэй зээлээр зам, төмөр зам болон дэд бүтцийн удаан хугацаанд үр ашгаа өгдөг төслүүдийг санхүүжүүлнэ.
17.    Орон сууцны моргейжийг бид ярьж, эхлүүлж чадсан. Одоо жижиг, дунд бизнесээ дэмжин бизнесийн моргейжийг гаргаж ирэх цаг нь болжээ. Бид том төслүүдээ урагш нь түлхэнэ.
18.    Хос төмөр зам барих, талын зам төслүүдээ урагшлуулж, ирэх жилдээ 900-1200 мегаватт бүхий цахилгаан станцын хоёр төслөө эхлүүлнэ.
19.    Улаанбаатарын хурдны зам, шинэ онгоцны буудал, нисэх буудлын хурдны зам болон Дорнод, баруун таван аймгийг холбосон автозамын төслүүдээ 2016 оноос өмнө амжуулна.
20.    Монгол хүн бүрийн гар дээр байгаа хувьцаа үнэтэй, утгатай болно.
21.    Гадны хөрөнгө шууд орж ирдэг хайгуулын үйл ажиллагааг зөв зохион байгуулах учиртай. Зэрлэг капитализм шиг хэн дуртай нь, хаана ч хамаагүй ухах бус үе шаттай, зөв зохион байгуулах, тодорхой зарчим дээр суурилсан бодлоготойгоор энэ ажлаа ирэх хавраас эхлүүлэх бэлтгэлийг хангана.
22.    Саяхан УИХ 2015 оны төсвийг ялангуяа урсгал зардал талдаа нэлээд танаж баталсан. Зөв зүйтэй энэ алхмыг үргэлжлүүлж, хүссэн хүсээгүй шинэ Засгийн газар ирэх оны төсвийг орлого талд нь дахин нэг их наяд төгрөгийг асуудлыг төсвийн тодотголд тусгаж, бодитой болгож, бууруулахаас өөр аргагүй.
23.    Хөрөнгийн биржээ хөдөлгөөнд оруулж, хоёр дахь зах зээл, хувийн хэвшил, иргэдээ дэмжих асуудлыг барьж авах цаг болсон. Төрийн өмчийг эзэнжүүлэх асуудал бидний гол анхаарлаа хандуулах асуудал. Хувьчилсны дараа төр ядаж 51 хувийг эзэмшдэг одоогийн хуулийг шинэчилнэ. Төр үнэхээр хувь эзэмших шаардлагатай бол хяналтын багцын 34 хувь байхад л хангалттай. Харин тухайн компанийн өмчийн 51 ба түүнээс дээш хувийг хувийнхан эзэмшиж, менежментийг нь хариуцдаг шинэ зарчимд шилжинэ.
24.    Төрийн өмчийг эзэнжүүлэх асуудал зөвхөн бизнесийн салбараар хязгаарлагдахгүй. Нийгмийн салбарт хувьчлалыг эхлүүлж, үйлчилгээнд компанийн засаглалын шинжийг нэвтрүүлэх гол реформыг бид эхлүүлнэ.