Эхлээд хойд хөршийнхөө түүхээс жижигхээн хэсгийг нь эргэн санацгаая. П.А.Столыпин гэж нөхөр 1906-1911 оны хооронд одоогийнхоор Оросын Ерөнхий сайдын албыг хашсан юм. Түүнийг аугаа их өөрчлөгч хэмээн нэрлэх нь бий. Үнэхээр ч Оросын түүхэнд олон ч реформ хийсэн байдаг. Даанч хорлогдсон. Түүнээс биш Оросыг танихын аргагүй өөрчлөх ёстой хүн мөнөөсөө мөн байсан гэлцдэг юм. Тэрбээр төрийн Думдаа хандан, “Орост гадаад, дотоод нөхцөл нь тайван байх боломжийг 20 жил олгочих. Та нар огт өөр Оросыг хүлээж авах болно. Тэдэнд аугаа их давалгаа хэрэгтэй байна. Бидэнд аугаа их Орос хэрэгтэй байна” гэсэн байдаг. Гэвч Дум дахь намууд нь тэрхүү гадаад, дотоод тайван байдлыг олгохын оронд гадагшаа ч, дотооддоо ч дайн самуун дэгдээсээр байгаад эцэстээ коммунизм байгуулахаар 80 орчим жил зүтгэн, улмаар улс орноо дампуурсан байх жишээтэй.

  Монголд яг ийм цаг үе ирж байна гэхэд хилсдэхгүй. Сингапур тайван байсандаа давснаас өөр юмгүй байсан хэрнээ 20 жилийн дотор “Азийн бар” болтолоо хөгжжээ. Гэтэл бид сүүлийн 25 жил бужигнаж байна. Хэрэлдлээ гэсэн үг. Төр нь тогтворгүй байлаа гээд хэлчихсэн ч болно. Сүүлдээ сонгуулийн дараа орон нутгийн чанартай хөөрхөн дайн байлдаан ч хийх янзтай болоод явчихлаа.

  Харин одоо энэ мэтийн бүх бужигнаандаа цэг тавих цаг ирж. Дэлхийн улстөрийн бодлого ч ийм байхгүй бол жижигхэн Монгол чамайг зажлахгүй залгина шүү гэх болсоныг анзаарахгүй байхын арга алга. Тиймээс төр тогтвортой байх асуудлыг одоо л тууштай тавихгүй бол дахин хэзээ ч гэсэн зарчим үйлчилж магадгүй байна.   Эдүгээ л гэхэд шинэчлэлийн гэгдэх Засгийн газар бужигнаад тоос шороо нь жаахан намжсан ч үл ойлгогдох, үл итгэх байдал үндсэндээ нийгмийг хамарсан байна. Хүн бүхэн л Оюу толгой энэ тэр гээд шаагидаг байсан бол эдүгээ тогтвортой байдал хэмээн өөрийн эрхгүй дуугарах боллоо. Сая л гэхэд яав. Ерөнхий сайдыг огцруулна, огцруулахгүй гэж бараг бүтэн хоёр сарын турш түүнийг нааш цааш нь чангаагаад ажлыг нь хийлгэсэнгүй. Төр хүлээлтийн байдалд орчихоор хүмүүс хүртэл эргэлзэнгүй нөхцөл байдалд өөрийн эрхгүй орчихдог юм байна. Дараа дан дээлтэй гарга, давхар дээлээ тайлцгаа гэж бас л баахан шаагилдав. Дараа нь огцруулж байна гэж баахан жүжиг тавьцгаалаа. Дараа нь шинэ Ерөнхий сайдыг томилох гэж хэсэг хүнийг хөөрүүлж, хэдэн хүнийг муужруулах шиг боллоо. Дараа нь намуудад хамтарч ажиллах хүсэлт тавьжээ.  Дараа нь...

  Одоо дараа нь тэглээ, ингэлээ гэж хар бараан зүйл өгүүлэхгүйгээр эрхэм Ерөнхий сайдыг ажилд нь оруулах цаг нь ирлээ. Тэгэхгүй бол нийгэм энэхүү унтаа дүрнээсээ нэг л өдөр сэрж, айхтар ууртайгаар өндийж магадгүй байна. Яагаад гэхээр хүмүүсийн амьдрал энэ намуудын хоорондын хэрүүл, бүлэглэл холбоотонгуудын  тэмцлийн гол золиос болоод байгааг эрхбиш ойлгож эхэллээ. Тиймээс өдгөө ганцхан зүйлийг л тэд хүсч байна. Тэр нь амар тайван амьдрал. Хоногийн хоолгүй байх нь хамаагүй, амар амгалан амьдармаар байна хэмээн олон хүн өгүүлэх болж. Амар тайван амьдрал нь өөрийн эрхгүй төр хэр амар тайван байхаас шалтгаалж байна. Төр амар тайван байхын үндэс нь түүний тогтвортой байдал. Өөр юу ч биш. Гүйцээ. Засгийн газар ажлаа хий. Сонголтоо бид хуулийн хугацаанд нь хийе хэмээн ярьж байна. Тиймээс эрхэм Ерөнхий сайд Ч.Сайханбилэгийн саналыг намууд хүлээж аваасай билээ. Ялангуяа МАН. Ер нь ард түмнийхээ амар тайван амьдрал, сайн сайхан ирээдүйн төлөө МАНАН, будангаараа дуудуулахад яадгийм. Ардын нам үнэхээр ардын төлөө нам юм бол одоо энэ засагтай хамтрах хэрэгтэй. Эс тэгвээс ард түмэн чинь жинхнээсээ элгээрээ хэвтэх гээд байна. Элгээрээ хэвтсэн ард түмэн цаг нь ирэхээр та нарын хэнийг нь ч хайрлахгүй далаар чинь тавих торгон ирмэг дээр ирчихээд байна.  Тиймээс энэ удаагийн Засгийн газарт УИХ-д суудалтай бүх нам, бие даагчид орох хэрэгтэй байна. Тэгээд тогтвортойхон төртэйгөөр сонгуулийн жил хүргэе. Хамгийн гол нь та нар иргэдийнхээ амьдралыг л жаахан бодоодох. Одоо Засгийг бужигнуулах юм бол хамаг юм замбараагаа алдаж, энэ бүхний хариуцлагыг МАН үүрч таарна шүү. Хүссэн хүсээгүй үүрнэ. Яагаад гэхээр Монголын ард түмэн та нарт бас итгэж явдаг юм шүү дээ. Сая ч яахав АН өөрөө өөрсдийгөө бужингнууллаа. Одоо энэ намын дундаас тийм тэнэг гарахгүй биз. Тэгэхээр хамаг бүхний зангилаан дээр эдүгээ зөвхөн МАН сууж байна. Та нар Засагт ор. Үнэхээр Ардын нам юм бол тэр ардынхаа төлөө бусадтайгаа хамтраад, хошуучлаад зүтгэ. Ирэх сонгуулиар хэр сайн сөрөг хүчнй үүрэг гүйтгэв гэдгээр та нарыг лав дүгнэхгүй шүү. Харин төрийг хэр тогтвортой байлгав гэдэг асуудал та нарын гол шалгуур болж магадгүй.