Ч.Сайханбилэгийн тэргүүлэх шийдлийн Засгийн газарт хамтрах эсэхээ МАН өнөөдрийн Бага хурлаараа шийднэ. Тиймээс тэд өчигдөр Бага хурлаа хийхээр товлоод байсан ч АН-тай хийж буй  зөвшилцлийн үр дүн шийдвэр гаргах хэмжээнд хүрээгүй гэсэн шалтгаанаар хойшлуулсан.

    МАН-ын Удирдах зөвлөлийн гишүүд Засгийн газарт хамтрах эсэх дээр санал зөрөлдөж байгаа бөгөөд Ч.Сайханбилэгийн Засгийн газарт хамтрах юм бол Н.Алтанхуягийн Засгийн газрыг огцруулсан үндэслэлээсээ буцсан хэрэг болно гэж үзэх хүн цөөнгүй байгаа гэнэ. Харин Засгийн газарт орох нь зөв гэж үзэж байгаа хүмүүсийн хувьд улс орны эдийн засаг, нийгэм, улс төрийн тогтвортой байдлыг хангах үүднээс ийм алхам хийх хэрэгтэй. Тэгэхгүй бол 2016 оныг хүлээлгүй улс орны нөхцөл байдал хүндрэхээр байна гэсэн үндэслэл гаргаж тавьж байгаа гэнэ.

 

МАН-ын “Стратеги” академиас МАН Засгийн газарт орж, хамтрах эсэх асуудлаар ард иргэдийн дунд энэ сарын 25-наас 27-ны хооронд судалгаа явуулсан юм байна. Судалгаанд Улаанбаатар хотын 9 дүүрэг, Баян-Өлгий, Говь-Алтай, Дорнод, Завхан, Дархан-Уул, Өмнөговь, Сүхбаатар, Увс, Ховд, Хэнтий аймгийн нийт 2500 иргэн хамрагджээ. Судалгааны дүнгээс харахад иргэд МАН-ыг Засгийн газарт орж улс орныг эдийн засгийн хямралаас гаргаж, ард түмний амьдрал ахуйг өөд татах нь зүйтэй гэсэн дүгнэлт гарсан гэнэ. Энэ талаар МАН-ынхан албан ёсны цахим хуудсандаа мэдээлжээ.