МАН-ын Бага хурал хойшлон байж хуралдав. Бага хурлын 300 гаруй гишүүд байдгаас 200 орчим нь ирсэн байна. Тэд эхлээд нэлээд ширүүхэн хуралдаж эхэлжээ. Өнгөрсөн хоёр жилийн гомдол, бухимдал, АН-ын ёс зүйгүй үйлдлийг ихэд ярилцаж байж. Гэтэл шинэ Засгийн газрын тэргүүн Ч.Сайханбилэгээс МАН-ын Бага хурлын гишүүдэд илгээлт, мэндчилгээ иржээ. Тэрээр "Монголын түүхэнд төрсөн 28 Ерөнхий сайдын 22-ийг нь төрүүлсэн МАН-ынхан та бүхэн Засгийн газарт орж улс орноо бодоо ч ээ. Улс орны нөхцөл байдал маш хүнд байна. Та бүхний дэмжлэг туслалцаа хэрэгтэй цаг үе ирсэн" тухай онцлон бичсэн байсан гэнэ. Өөрөөр хэлбэл Ч.Сайханбилэг Ерөнхий сайдаас илгээсэн мэндчилгээ нь МАН-ынханыг аргадаж, гуйсан өнгө аястай байжээ.
                  Түүний энэ үгийг МАН-ын Бага хурлын гишүүдийн ихэнх нь сэтгэлийн үг, арга барагдаад гуйж байна. Ч.Сайханбилэгийн улс орон биш бидний Монголчуудын улс орон. Энэнээс илүү яаж гуйлгаж нүүрийг нь улалзуулах вэ? Уг нь биднийг анхан шатны гишүүд маань битгий хамтраарай гэж захисан юм. Ч.Сайханбилэгийн мэндчилгээ сэтгэл хөвсөлзүүллээ гэж олонх нь ярилцжээ. Харин цөөнгүй хэсэг Ч.Сайханбилэг заль гаргаж байна. АН-ынхан угаасаа ийм заль гаргахдаа сайн. Яг цагаа тулахаар биднийг дандаа хулхидсаар ирсэн. Манай нам АН шиг туйлбаргүй биш. Хэлсэн ярьсандаа тогтвортой байдаг. Ч.Сайханбилэгийн энэ зальд итгэж болохгүй. Хэрэв хамтрахаар бол АН-ын дарга З.Энхболдын ч гэсэн гуйлтыг олон түмний өмнө авах ёстой. Тэр хүртэл гэдийцгээе. Бас улс орноо удирдаж чадахгүй МАН-аас тусламж хүсч байгаагаа олон нийтийн мэдээллийн хэрэгсэлээр дамжуулан албан ёсоор илэрхийлүүл. Тэгж байж хамтрахаа шийднэ гэж байжээ. Юутай ч гэсэн МАН-ын Бага хурлын гишүүдэд илгээсэн Ч.Сайханбилэгийн мэндчилгээ сюрприз болсон байна. Засгаа удаан хугцаанд оршин тогтнуулж, эдийн засгаа сэргээх гэж байгаа Ч.Сайханбилэгийн хувьд энэ зэргийн мэндчилгээ юу ч биш байж мэднэ л дээ. Н.Алтанхуягаас өөр хэн ч байсан ингэх л байсан биз. Улс орныхоо төлөө сөгдөж гуйсан ч болно. Харин улс орны төлөө сөгдөж гуйлгах гэж гэдийгээд байгаа хэсгийнхэнийг бас ойлгоход төвөгтэй.
                            Удтал хуралдана гэж төлөвлөж байсан МАН-ын өчигдөрийн Бага хурал санасныг бодвол тун шуурхай болоод өнгөрлөө.  Засгийн газарт орж ажиллах эсэх ганцхан асуудлыг хэлэлцээд өндөрлөв. Уг асуудлыг Бага хурлын гишүүдийн дийлэнх олонх дэмжив. Тэгэхээр олонхоороо гаргасан энэ шийдвэрээ МАН-ынхан буруутгахгүй байх. Учир нь МАН-ынхан АН-ынхан биш болохоор "сэлэмчид" гарч ирэхгүй олонхоо дагна. МАН-ын өмнө ийм зам зурагдлаа.