Бие даагчдын бүлгийг төлөөлж УИХ-ын гишүүн Ц.Даваасүрэн мэдээлэл хийлээ. Тэрээр мэдээллийнхээ эхэнд энэ долоо хоногт УИХ-ын чуулган, Байнгын хороогоор хэлэлцэх Төрөөс ойн талаар баримтлах бодлого батлах тухай саналыг дэмжиж буйгаа илэрхийллээ.  Мөн Галт зэвсгийн тухай хуулийн төсөлд шүүмжлэлтэй хандаж байгаа гэв. Учир нь хөдөөд ганц гэрээр нутагладаг малчид нь араатан амьтнаас малаа болон өөрсдийгөө хамгаалахын тулд бууг хэрэглэдэг. Харин дээрх хууль батлагдаад малчдын бууг хураавал өөрсдийгөө хамгаалах боломжгүй болно гэсэн юм. Тэгэхээр малчдын бууг хурааж авна гэхээсээ илүү тооллого бүртгэлийг сайжруулах талаар хуулийн төсөлд тусгах хэрэгтэй гэсэн юм.

Үүний дараа Ц.Даваасүрэн гишүүн шинээр байгуулагдах Засгийн газрын талаар байр суриа илэрхийллээ. Хэрэв МАН, АН-тай нэгдэж МАНАН байгуулбал бие даагчид сөрөг хүчин болно гэдгийг өмнөх долоо хоногт мэдэгдэж байсан. Өнөөдөр ч үүнийг дахин санууллаа. Тэрбээр "Хоёр дахь удаагаа МАНАН байгуулагдах нь бараг тодорхой болчихлоо. Гэхдээ энэ нөхцөлд бид ард түмний төлөө үйлчлэх сөрөг хүчин байна гэдгээ дахин илэрхийлж байна" гэсэн юм.

Тэрээр мөн МАН нь Ч.Сайханбилэгийг Ерөнхий сайд болохыг эсэргүүцэж байснаа Засгийн газарт орох болоход зөвшөөрч байгаа нь анхнаасаа зөвхөн Засагт орох хүсэлтэй байсных нь илрэл гэв. Тэрээр энэ талаар “Улс орноо бодох нь заавал Засгийн газарт орсноор илэрхийлэгдэхгүй. Иргэний зориг ногоон намын хоёр гишүүн Засгийн газарт орж байхад бид гурав ч гэсэн орж болох л байсан. Гэхдээ бид атаа жөтөөгөөр хүслээ илэрхийлдэггүй, бүтээлч сөрөг хүчин байх болно” гэсэн юм.

Хэрвээ МАНАН байгуулагдвал бие даагчид Засгийн газарт өрийн таазаа нэмэгдүүлэхгүй байх “давхар дээл”-гүй сайд нарыг томилохыг сануулна гэв. Мөн үндсэн хуулийн өөрчлөлтийг мэргэжлийн түвшинд сайн хийхийг зорино гэлээ.