МАН-ын бүлэг өнөөдөр хуралдаж, цаг үеийн асуудлаар ярилцжээ. Бүлгийн хурлын дараа  МАН-ын Ерөнхий нарийн бичгийн дарга Ж.Мөнхбат,  МАН-ын бүлгийн дэд дарга Д.Оюунхорол нар сэтгүүлчдэд мэдээлэл хийлээ. Өнөөдөр хуралдсан МАН-ын бүлгийн хурлаар Дэлхийн банкны олон улсын хөгжлийн ассоциацийн хөнгөлөлттэй зээлийн хөрөнгөөр хэрэгжүүлэх “Ухаалаг засаг төслийн санхүүжилтийн хэлэлцээр”-ийн төсөл, мөн тус ассоциацийн хөнгөлөлттэй зээлийн хөрөнгөөр хэрэгжүүлэх “Тогтвортой амьжиргаа-3” төслийн санхүүжилтийн хэлэлцээрийн төслүүдийг хэлэлцсэн ч тодорхой шийдэлд хүрч чадаагүй байна. Тиймээс зээлийн асуудлыг дахин судалж үзэх шаардлагатай гэж үзэн бүлгээс байгуулагдсан ажлын хэсэг ажиллахаар болжээ.
               Харин Засгийн газарт хамтрах асуудлаар “МАН-ын Бага хурал өнгөрсөн амралтын өдөр хуралдаж засагт хамтрах шийдвэр гаргасан. "Энэ хугацаанд МАН-ын бүлэг дөрвөн удаа хамтрах асуудлыг хэлэлцсэн бол Удирдах зөвлөл нь гурван удаа хуралдаж, эцэст нь Бага хурлаар асуудлыг шийджээ. Мөн хоёр намын бүлгээс байгуулагдсан ажлын хэсгийн зөвшилцөх уулзалтын хүрээнд Засгийн газрын бүтцийн тухай асуудлыг ярилцаагүй. Харин өнөөдрөөс эхлэн Засгийн газрын бүтэц бүрэлдэхүүний асуудлыг ажлын хэсгүүд хэлэлцэнэ” гэж мэдэгдлээ.