МАХН-МҮАН-ын “Шударга ёс” эвслийн бүлгийн хуралдаан одоо ч үргэлжилж байна. Өнөөдрийн хуралдаанд МАХН-ын гишүүд Засгийн газарт хамтрахгүй гэдгээ илэрхийлжээ. Энэ талаар МАХН-ын Ерөнхий нарийн бичгийн дарга Г.Шийлэгдамбаас тодрууллаа.

-    МАХН Засгийн газарт хамтрахгүй гэлээ. Энэ талаар албан ёсны мэдээлэл өгөөч?

-    МҮАН бол шинэ Засгийн газарт хамтрана. Харин манай гишүүд хамтрахгүй гэдгээ өнөөдөр бүлгийн хурал дээрээ хэллээ. Ингээд хоёр нам хоёр талд энэ асуудлаар ярилцаж байна. Нэгдсэн шийдвэрээ хараахан гаргаагүй байгаа. Гэхдээ манай гишүүд Засгийн газарт орохгүй гэдгээ бүлгийнхэндээ албан ёсоор мэдэгдээд байна.

-    Засагт орохгүй гэсэн шалтгаанаа тайлбарлаач?

-  Албан тушаал, сандал суудалтай огт хамаагүй. Хамгийн чухал нь өмнөх ажлаа дүгнээгүй байна. Өмнө нь байгуулсан гэрээнийхээ хэрэгжилтийг дүгнэж алдаа, оноогоо ярих ёстой биз дээ. Тэгээгүй байж гэнэт дараагийн ажлыг ярих нь буруу юм. Хоёрдугаарт, АН, МАН хоёрын ажлын хэсэг уулзаад хямралаас хэрхэн гарах эсэх асуудлаар тодорхой зүйлүүдийг ярихгүй байна. Мөн Оюутолгой, Тавантолгой гээд цаагуураа тохироо хийгдсэн байж магадгүй гэсэн хардлага байна. Тиймээс энэ мэт асуудлыг нягталж, шалгах ёстой гэсэн байр суурьтай байгаа.

-    Засгийн газарт орох, үгүй ээ эцсийн байдлаар хэзээ мэдэгдэх вэ?

-   МҮАН болон манай нам тус бүрдээ энэ асуудлаар ярьж байна. Гэхдээ манайх байр сууриа урьдчилаад мэдэгдсэн. Хуралдаан дууссаны дараа тодорхой болно.

-    Хэрвээ Засагт орж чадахгүй бол хүчтэй сөрөг хүчин байж чадах уу?

-    Мэдээж сөрөг хүчин болоод ажиллана.