УИХ дахь АН-ын бүлгийн дарга Д.Эрдэнэбат, УИХ-ын гишүүн С.Одонтуяа, ажлын хэсгийн ахлагч М.Батчимэг гишүүн нар дөнгөж сая мэдээлэл хийлээ. АН-ын бүлэг өчигдөр хуралдсан боловч ҮЗХ-ны хурал болон ажлын хэсгүүдийн уулзалтаас шалтгаалан хурлын талаарх мэдээллээ хийгээгүй байсан юм. Өчигдрийн бүлгийн хуралдаанаар нам, эвслийн бүлгүүдтэй хийсэн ажлын хэсгийн уулзалтыг дүгнэж ярилцсан байна.
                     Мөн АН-ын бүлгийн даргын мэдээлж буйгаар өнөөдөртөө багтаж Ерөнхий сайд УИХ-д Засгийн газрын бүтцийг өргөн барих аж. Хэрэв амжихгүй бол маргааш өглөө өргөн барихаар ажиллаж байгаа юм байна. Харин сайд нарын тухайд энэ долоо хоногийн тав дахь өдөр гэхэд тодруулж дуусна. Зарим нэг амжихааргүй зүйл гарвал ирэх долоо хоногт багтаж сайдуудыг томилно гэж АН-ын бүлгийн дарга мэдээллээ. Мэдээллийн төгсгөлд ҮЗХ-ноос гаргасан засаг хамтарч байгуулах шийдвэрийн дагуу АН-ынхан УИХ-д суудалтай нам, эвслийн бүлгүүдтэй тодорхой төвшинд зөвшилцөлд хүрчээ. Тухайлбал МАН, ИЗНН, "Шударга ёс" эвслийн бүлгийнхэн бүгд Засгийн газарт хамтарч ажиллахаа илэрхийлсэн албан бичгийг АН-ын бүлэгт ирүүлээд байгаа ажээ. Тиймээс УИХ-д суудалтай нам болон эвслийн бүлгүүд Ч.Сайханбилэгийн засгийн газарт хамтарч ажиллана гэдэг эцсийн байр суурь тодорхой боллоо гэсэн юм.